La regenza grischuna refusa cleramain l'iniziativa dal chantun Berna per ina differenziaziun da la taglia sin ils vehichels a motor sin plaun federal. Tenor sia resposta da consultaziun n'è l'intenziun da stgaffir impuls finanzials per promover vehichels ecologics betg nova. Sin basa d'ina retschertga ha il cussegl federal decidì gia l'onn 2005 da betg persequitar vinavant l'idea da concepir da nov la taglia sin ils automobils sco taglia directiva ecologica. Empè da quai èn ils chantuns vegnids intimads da stgaffir impuls correspundents cun agid da lur taglias sin ils vehichels a motor. Sco auters chantuns ha er il Grischun concludì e mess en vigur en il fratemp relaschs correspundents. Ina soluziun supplementara sin plaun federal tenor la proposta n'è betg necessaria, perquai ch'il sistem d'impuls proponì chaschunass per ina gronda part da las cumpradras e dals cumpraders in augment general dals pretschs da tut ils vehichels novs.

Da vischnancas e da regiuns

Andeer: La nova constituziun da la vischnanca d'Andeer dals 21 da november 2008 vegn approvada.
S-chanf: La regenza approvescha la revisiun parziala da la constituziun da la vischnanca da S-chanf dals 19 da november 2008.
Val Müstair: La constituziun communala da la vischnanca da Val Müstair, concludida a la votaziun a l'urna dals 28 da settember 2008, vegn approvada.
Tschintg Vitgs: La revisiun parziala da la constituziun dal circul dals Tschintg Vitgs dals 30 da november 2008 vegn approvada.
Breil: La regenza approvescha la revisiun totala da la planisaziun locala da la vischnanca da Breil dals 4 da november 2008.
Cursa internaziunala da muntogna Arosa Classic Car: A l'organisaziun da la "5. cursa internaziunala da muntogna Arosa Classic Car" vegn concedida la permissiun da duvrar gievgia, ils 10 da settember 2009, sco er venderdi/sonda e dumengia, ils 11/12 ed ils 13 da settember 2009, la ruta ch'è previsa tenor il plan da traject sin la via chantunala tranter Langwies ed Arosa.

Contribuziuns chantunalas a differentas instituziuns
Center per pedagogia speziala a Giuvaulta: La dumonda per remplazzar las fanestras da la halla da gimnastica dal center per pedagogia speziala a Giuvaulta vegn approvada. A l'instituziun responsabla vegn garantida ina contribuziun chantunala da construcziun da maximalmain 65'600 francs.

Projects da vias
La regenza ha approvà totalmain 3'730'000 francs per construir e per sanar ils suandants trajects da vias:

- via sursilvana: lavurs d'impressari, punt a spunda, Tavanasa

- via d'Avras: lavurs d'impressari, punt sur il Rain d'Avras, Campsut

- access a la via dal Partenz: lavurs d'impressari, punt dal Schwenditobel

- via dal Meir: lavurs d'impressari, viaduct da Solas

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun