Il cussegl grond vegn a s'occupar durant la sessiun da favrer 2009 per la segunda giada dal detretschament da las incumbensas giudizialas, suenter ch'el aveva returnà la fatschenta l'october passà a la cumissiun predeliberanta per giuditgar da nov la situaziun.
La cumissiun per giustia e segirezza ha puspè predeliberà la missiva cumplettada da la regenza per mauns dal cussegl grond, e quai en preschientscha da la cussegliera guvernativa Barbara Janom Steiner. En il rom da la revisiun parziala da la constituziun chantunala che vegn proponida da la regenza duai vegnir sclerida la dumonda da princip, sch'ils circuls duain survegnir er en l'avegnir incumbensas giudizialas u betg. Sco avant in onn è la fatschenta vegnida discutada en moda intensiva e cuntraversa. Ina pitschna maioritad da la cumissiun ha beneventà la reordinaziun da la giurisdicziun civila e penala per ademplir uschia las prescripziuns liantas da la procedura penala svizra e lur consequenzas per ils circuls e per las vischnancas. Ella pleda plinavant a favur d'ina clera separaziun da la politica e da la giustia sin il plaun cirquital ed a favur d'in detretschament da las incumbensas en il sectur da la giustia. En quest senn sustegna la maioritad da la cumissiun puspè la missiva da la regenza e s'exprima per la revisiun parziala da la constituziun chantunala per mauns da la votaziun dal pievel. Ina minoritad presuma, sche la proposta da la regenza vegn acceptada, ch'ils circuls vegnian per consequenza abolids facticamain e refusa il project. Ella preferescha da cumenzar cun il detretschament da las incumbensas pir a chaschun da la refurma da las structuras l'onn 2010.

Gremi: cumissiun per giustia e segirezza
Funtauna: rg cumissiun per giustia e segirezza