Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna vul adattar las premissas per survegnir ina renta per la partenaria u per il partenari da vita. Ella ha deliberà la missiva correspundenta tar la revisiun parziala da la lescha davart la cassa da pensiun chantunala dal Grischun. Il cussegl grond vegn a tractar la fatschenta en la sessiun d'avrigl.
Tenor il dretg vertent survegn la partenaria u il partenari da vita survivent (che n'è betg maridà) sut tschertas premissas ina renta, analogamain ad in conjugal vaiv. Questa renta per la partenaria u per il partenari importa dentant mo 75 pertschient da la renta per conjugals. En la sessiun da zercladur 2007 ha il cussegl grond acceptà ina incumbensa che pretenda da suttametter questa renta per la partenaria u per il partenari ad in'examinaziun.
En sia missiva propona la regenza ussa d'amplifitgar il dretg sin ina renta per la partenaria u per il partenari da vita. Da nov duain partenarias u partenaris survivents che ston procurar per il mantegniment d'almain in uffant communabel medemamain pudair profitar d'ina renta per la partenaria u per il partenari da vita, e quai independentamain da la durada da la communitad da vita. En cas da partenadis senza uffants communabels vegn mantegnida la durada da la communitad da vita d'almain 5 onns. Plinavant vul la regenza desister da la premissa "sustegn considerabel" ch'è fixada en la lescha. Da nov na ston las persunas che han il dretg d'ina renta betg pli inoltrar in contract da sustegn per survegnir ina renta per la partenaria u per il partenari da vita. Ma i vegn pretendì che la persuna assicurada haja communitgà durant sia vita en scrit a la cassa, tge persuna che ha il dretg da survegnir la renta. Per evitar abus ston las premissas per survegnir ina renta per la partenaria u per il partenari da vita vegnir ademplidas avant l'entrada d'in eveniment assicurà.
Concernent l'import da la renta per la partenaria u per il partenari retegna la regenza ch'el restia a 75 pertschient da la renta per conjugals. Tenor l'avis da la regenza è questa disposiziun giustifitgada perquai che l'egualitad concernent il dretg fiscal ed il dretg d'assicuranza sociala da pèrs maridads visavi pèrs en concubinat n'è betg anc realisada.
En la revisiun parziala da la lescha davart la cassa da pensiun prevesa la regenza er da stritgar senza cumpensaziun las disposiziuns davart la liquidaziun parziala. Questa disposiziun prescriva oz ch'i sto vegnir fatga ina liquidaziun parziala en cas d'ina extrada collectiva da 100 u passa persunas. Tenor la teoria e pratica actuala è questa cifra memia auta per las autoritads da surveglianza. Da nov duai la cumissiun administrativa da la cassa da pensiun chantunala fixar en in reglament las premissas e la procedura en cas d'ina liquidaziun parziala.
La finala propona la regenza che la cumissiun administrativa survegnia er la cumpetenza da permetter ulteriurs plans da prevenziun. Tras la pussaivladad da pudair porscher, ultra dal plan central, anc auters plans da prevenziun, ha la cassa da pensiun chantunala meglras schanzas en la concurrenza cun autras purschidras e cun auters purschiders.
Infurmaziuns:
cusseglier guvernativ dr. Martin Schmid, schef dal departament da finanzas e vischnancas, tel. 081 257 32 13 (da cuntanscher da las 14.00)

Gremi: regenza
Funtauna: rg chanzlia chantunala dal Grischun
Neuer Artikel