Il chantun Grischun sa participescha a la cunvegna interchantunala
davart la medischina fermamain spezialisada (CIMFS). Quai ha concludì la
regenza. Il cussegl grond aveva approvà la participaziun ils
21 d'october 2008. Il termin da referendum cunter questa revisiun
parziala è scadì ils 28 da schaner 2009. Entaifer quest termin n'èn
vegnids inoltrads nagins referendums.
En il sectur da la medischina fermamain spezialisada duai questa
cunvegna remplazzar la planisaziun vertenta dals singuls chantuns tras
ina planisaziun naziunala. La finamira principala è quella d'augmentar
la qualitad ed il niz per las pazientas e per ils pazients sco er da
meglierar la rentabilitad en quest sectur. La medischina fermamain
spezialisada cumpiglia - tenor la cunvegna - quels secturs e quellas
prestaziuns ch'èn caracterisads tras lur rarezza, tras lur grond
potenzial d'investiziun, tras lur grond basegn da persunal u d'apparats
tecnics ubain tras proceduras da tractament cumplexas. Latiers tutgan
tranter auter prestaziuns spezialisadas da la neurochirurgia, da la
chirurgia dal cor u da la transplantaziun da tscherts organs.
La revisiun da l'ordinaziun federala davart l'alarm vegn
beneventada
La regenza grischuna beneventa da princip la revisiun planisada da
l'ordinaziun federala davart l'alarm. Cun la revisiun da l'ordinaziun
davart l'alarm duain vegnir cuntanschidas meglieraziuns considerablas en
il sectur da l'avertiment e da l'alarm da la populaziun. L'object è en
spezial l'avertiment uffizial da la populaziun en cas da privels da la
natira tras ils posts spezialisads correspundents da la confederaziun e
l'obligaziun da derasar quests avertiments uffizials tras las medias
adattadas.
Da vischnancas e da regiuns
Almen: La regenza approvescha la nova constituziun da la vischnanca
dad Almen dal 1. d'october 2008.
Grischun central: La regenza approvescha la cumplettaziun dal plan
directiv regiunal ch'è vegnida concludida da la regiun dal Grischun
central. L'object da questa cumplettaziun è tranter auter la
determinaziun dal perimeter dal parc Ela, il barat dals engrondiments
dals territoris da skis opziunals Val Schmorras / Piz Mez sco er il
relasch da princips per la planisaziun da resorts da vacanzas.
Contribuziuns chantunalas a differentas instituziuns
Chasa da burgaisas e da burgais, Cuira: Il project preliminar per la
midada da construcziun e per l'engrondiment da la chasa da burgaisas e
da burgais a Cuira vegn approvà. Cun resalva da l'approvaziun definitiva
dal project vegn garantida a l'instituziun responsabla ina contribuziun
chantunala da maximalmain 9'400'000 francs.
Uniun da las Gualsras e dals Gualsers dal Grischun: A l'uniun da las
Gualsras e dals Gualsers dal Grischun vegn garantida ina contribuziun da
100'000 francs per la realisaziun e per la signalisaziun da la senda da
las Gualsras e dals Gualsers dal Grischun.
Promoziun da la cultura: La regenza ha concedì contribuziuns da
totalmain 292'500 francs per promover 18 occurrenzas ed ovras
culturalas.
Projects da vias
La regenza ha approvà totalmain 8'191'000 francs per construir e per
sanar ils suandants trajects da vias:
- via naziunala A28: stabiliments specifics per la viafier retica e
stabiliments da ventilaziun en centralas d'electricitad; sviament da
Saas
- via dal Partenz: lavurs d'impressari, punt dal Stützbach;
Selfranga - Tavau
- access a la via dal Güglia: lavurs d'impressari, punt dal
Pajüelabach; bifurcaziun, via dal Güglia - Tschiertschen
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun