Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna crititgescha intgins puncts da las midadas che la confederaziun ha planisà per realisar la nova finanziaziun da la tgira. Las ordinaziuns executivas da la confederaziun concernan en emprima lingia l'assicuranza da malsauns. Tenor la nova lescha federala davart la reordinaziun da la finanziaziun da la tgira, ch'il parlament ha deliberà durant l'ultima sessiun da stad, paja l'assicuranza obligatorica per la tgira da persunas malsaunas en l'avegnir ina contribuziun a las prestaziuns da tgira che vegnan prescrittas da las medias e dals medis. Questa contribuziun è fixada en l'ordinaziun ed è graduada tenor il temp impundì.
Tenor l'avis da la regenza èn cunzunt las contribuziuns che vegnan garantidas en il sectur da las chasas da tgira fixadas memia bass. Tenor calculaziuns da l'uffizi da sanadad resultan qua tras per il chantun Grischun contribuziuns ch'èn per 13.7 pertschient resp. per 5.7 milliuns francs memia bassas. En sia resposta da consultaziun recloma la regenza plinavant ch'ils sbozs da las ordinaziuns cuntegnian per part libertads d'interpretaziun considerablas, las qualas engrevgeschian da realisar la nova finanziaziun da la tgira sin plaun chantunal. Ultra da quai crititgescha la regenza l'urari ch'è planisà per metter en vigur la nova finanziaziun da la tgira. Las revisiuns da las leschas e da las ordinaziuns ch'èn necessarias per reordinar la finanziaziun da la tgira sin plaun chantunal dovran almain 1 onn fin 1 onn e mez. Perquai propona la regenza a la confederaziun da spustar la data per metter en vigur la nova finanziaziun da la tgira, e quai dal 1. da fanadur 2009 sin il 1 da schaner 2011.

Da vischnancas e da regiuns
Tavau: Cun las resalvas usitadas ha la regenza approvà la revisiun parziala da la planisaziun locala "Indriz d'ennavar Brämabüel/Bolgen" che la vischnanca da Tavau aveva concludì ils 27 da settember 2007.
Sumvitg: Cun resalva d'ina contribuziun federala da 47 pertschient vegn garantida ina contribuziun chantunala da 37.8 pertschient u da totalmain 8'085'420 francs als custs da la meglieraziun generala da Sumvitg.

Contribuziuns chantunalas a differentas instituziuns
grischunMUVEL SA: La regenza ha fixà las contribuziuns per ils onns 2009 fin 2011 per commerzialisar ils animals sur ils martgads publics da muvel da maz. La grischunMUVEL SA, ch'è incumbensada cun l'organisaziun, survegn per quest intent ina contribuziun da basa da 127'000 francs per onn sco er ina contribuziun per chau da 20 francs per arment e da 2.50 francs per nursas e per chauras. Per promover la vendita da nursas e da chauras vegnan plinavant pajads 6 francs en media per mintga animal commerzialisà, graduà tenor distanzas da transport.
Fundaziun Origen: Sut la premissa da la finanziaziun totala vegn garantida a la fundaziun Origen ina contribuziun da 170'000 francs tenor la nova politica regiunala da la confederaziun (NPR) per il project "Installaziun dal manaschi da teater Origen 2009 fin 2011". Plinavant paja il chantun ina contribuziun da medema autezza.
Scola-dimora a Cuira: Il project da construcziun per sanar las cuschinas da l'internat da la scola-dimora a Cuira vegn approvà e vegn sustegnì cun ina contribuziun chantunala da construcziun da maximalmain 64'800 francs.
Museum svizzer da transports: Al museum svizzer da transports a Lucerna, che festivescha l'onn 2009 ses giubileum da 50 onns, vegn concedida ina contribuziun da 50'000 francs. Durant l'onn da giubileum 2009 survegnan las scolas publicas dal chantun uschia entrada libra en il museum da transports.
Festival XONG 09: Il festival XONG 09, che ha l'intent da promover il barat cultural en la regiun da cunfin dals trais pajais Val Müstair/Engiadina bassa, "Oberes Gericht" e Vnuost sura, vegn sustegnì cun ina garanzia da deficit da maximalmain 20'000 francs.
Uniun d'agid umanitar per la Russia: Per la 18avla missiun d'agid da l'uniun d'agid umanitar per la Russia vegn concedida ina contribuziun da 30'000 francs.
Federaziun grischuna per il sport: La contribuziun or dal fond da sport a la federaziun grischuna per il sport importa 31'000 francs. Quest import vegn duvrà per il premi grischun da sport, per realisar il parlament da sport, per metter a disposiziun ina infurmaziun giuridica e per l'activitad generala da la suprastanza l'onn 2008.
Fundaziun per sport da prestaziun a Tavau: Per sustegnair il center naziunal da trenament per passlung a Tavau survegn la fundaziun per sport da prestaziun a Tavau ina contribuziun da 400'000 francs or dal fond da sport.
Cuminanza d'interess da las uniuns da sport da Cuira: A la cuminanza d'interess da las uniuns da sport da Cuira (ICS) vegn pajada ina contribuziun da 60'000 francs or dal fond da sport per il project "rait da sport Cuira".
US Danis/Tavanasa: Per construir la nova chasa dal club survegn la US Danis/Tavanasa ina contribuziun da 75'600 francs or dal fond da sport.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel