La regenza grischuna beneventa da princip la revisiun planisada da
l'ordinaziun davart la reducziun da las ristgas en connex cun substanzas
chemicas. Cun las midadas propona la confederaziun differentas
adattaziuns al dretg da la UE ch'è stà suttamess dapi l'ultima revisiun
a numerusas midadas e cumplettaziuns. Concretamain duain las
reglamentaziuns davart las substanzas nuschaivlas en battarias, en
apparats electrics ed electronics sco er en vehichels vegnir
actualisadas tenor il stadi il pli nov da la legislaziun da la UE. Sco
che la regenza declera en sia resposta da consultaziun, possia vegnir
evità uschia ch'i resultian da quai barrieras per il commerzi.
Da vischnancas e da regiuns
Alvra, Bernina: L'adattaziun dal plan directiv chantunal 2000
(PDChant) cun la tematica dal patrimoni mundial da la UNESCO "viafier
retica en la cuntrada Alvra / Bernina" è vegnida concludida da la
regenza e declerada sco lianta per las autoritads dal chantun Grischun.
Tujetsch: Il project "rempar da lavinas L'Ondadusa II" da la
vischnanca da Tujetsch vegn approvà e sustegnì cun ina contribuziun da
maximalmain 2'272'000 francs.
Tavau: Per sanar la via champestra principala Spina vegn garantida a
la vischnanca da Tavau ina contribuziun chantunala da maximalmain
234'036 francs.
Mundaun: Als custs supplementars dal project "dustanza Val da
Cavegn" vegn - premess che la confederaziun paja ina contribuziun - garantida a la
vischnanca da Mundaun ina contribuziun chantunala da
29'700 francs.
Domat: La revisiun parziala da la planisaziun locala da la
vischnanca da Domat dals 30 da november 2008 vegn approvada cun intginas
resalvas ed instrucziuns.
Projects da vias
La regenza ha approvà totalmain 2'885'000 francs per construir e per
sanar ils suandants trajects da vias:
- via dal Bernina: lavurs d'impressari e lavurs da cuvrida, punt a
spunda La Motta, pass dal Bernina - La Rösa
- via d'Engiadina: lavurs d'impressari, punt sur l'Alvra, Bever -
Madulain
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun