Il nov plan per il svilup dal guaud da l'Engiadin'ota è vegnì elavurà durant dus onns sut la direcziun da l'uffizi forestal dal Grischun. Quest plan ha l'intent da mantegnair ils interess publics per il guaud e procura per in'utilisaziun durabla dal guaud. El sa cumpona d'in model directiv e dad otg fegls d'object cun plans correspundents.
Il model directiv cuntegna ils princips da la cultivaziun dal guaud entaifer il territori da planisaziun. En ils fegls d'object ed en ils plans appartegnents vegnan enumerads ils interess spezials ord vista da la publicitad sco er las mesiras da cultivaziun che tutgan tiers. Ils suandants temas vegnan tractads pli detagliadamain:
- protecziun cunter privels da la natira     
- producziun da laina     
- protecziun da la natira e da la cuntrada     
- recreaziun e turissem     
- agricultura     
- selvaschina e chatscha     
- projects     
- basegn da coordinaziun     

A chaschun d'ina occurrenza publica d'infurmaziun che ha lieu glindesdi, ils 30 da mars 2009, a las 20.15 en la sala communala a Samedan, vegn la gruppa da planisaziun responsabla a preschentar il sboz dal nov plan per il svilup dal guaud da l'Engiadin'ota ed ad explitgar en spezial las pussaivladads da cooperaziun da la publicitad. Suenter l'occurrenza d'infurmaziun vegn il sboz da planisaziun exponì publicamain en tut las vischnancas da l'Engiadin'ota per laschar prender posiziun. Dal sboz pon ins er prender invista tar l'uffizi forestal a Zuoz u tar l'uffizi forestal a Cuira.
Sin basa da las posiziuns inoltradas vegn concepì fin l'atun 2009 il plan definitiv per il svilup dal guaud da l'Engiadin'ota, e quai cun la cooperaziun dals circuls pertutgads. Suenter duai il plan vegnir suttamess a l'approvaziun da las vischnancas e da la regenza.

Infurmaziuns:
- Giachem Bott, inschigner forestal regiunal, tel. 081 851 20 81
- Riet Gordon, uffizi forestal, tel. 081 257 38 55

Gremi: uffizi forestal
Funtauna: rg uffizi forestal