La regenza ha concludì da relaschar definitivamain il concept
d'emprova per collocar e per assister persunas dal sectur d'asil en il
chantun Grischun e d'incumbensar l'uffizi da fatgs da polizia e da dretg
civil cun la realisaziun. Il concept, che vala dapi il zercladur 2006 e
ch'è sa mussà tut en tut sco cunvegnent, duai garantir ina collocaziun
economica ed adequata da las requirentas e dals requirents d'asil sco er
da las persunas admessas provisoricamain.
Sche las requirentas e sch'ils requirents d'asil e sche las persunas
admessas provisoricamain èn economicamain dependents, prevesa il concept
da collocar da nov questas persunas en alloschis collectivs e betg pli
en alloschis individuals, uschenavant che quai è pussaivel e
raschunaivel. Plinavant duain la collocaziun e l'assistenza vegnir
fatgas dependentas dal stadi da la procedura d'asil, perquai che - sco
quai che las experientschas han mussà - sa reducescha il basegn
d'assistenza, pli ditg che la dimora dura. Tenor il concept vegnan las
requirentas ed ils requirents d'asil sco er las persunas admessas
provisoricamain preparads en il center per l'emprima registraziun per
l'ulteriura dimora en il Grischun. Durant la procedura d'asil fin a la
decisiun d'asil collochescha il chantun questas persunas en differents
centers transitorics. Suenter la finiziun da la procedura arrivan las
persunas ch'èn obligadas da bandunar la Svizra en il center d'expulsiun.
Requirentas e requirents d'asil che chaschunan problems spezials vegnan
collocads separadamain en in center minimal. Requirentas e requirents
d'asil refusads che dumondan agid d'urgenza en il chantun Grischun duain
- tenor il concept - vegnir collocads en il center d'expulsiun.
Cun il concept da collocaziun po il chantun reagir en moda pli
flexibla sin las grondas variaziuns dal dumber da requirentas e da
requirents d'asil attribuids. Cun avrir novs centers transitorics
supplementars respectivamain cun serrar quels po il chantun adattar
uschia il dumber da plazzas da collocaziun al basegn. Dal rest cuntegna
il concept er finamiras e mesiras en connex cun l'assistenza durant la
procedura d'asil, sco per exempel en connex cun l'activitad da gudogn da
las requirentas e dals requirents d'asil u en connex cun la promoziun da
linguas. Medemamain cuntegna il concept regulaziuns spezialas per
persunas minorennas senza accumpagnament e per persunas che dovran
in'assistenza speziala.
Cuntrari ad auters chantuns vegnan las requirentas ed ils requirents
d'asil sco er las persunas admessas provisoricamain collocads ed
assistids en il Grischun cumplainamain tras il chantun. Qua tras vegnan
las vischnancas distgargiadas d'ina incumbensa difficila. Grazia al fatg
che la structura dals custs dals stabiliments da collocaziun è
favuraivla e che las proceduras vegnan liquidadas effizientamain e
grazia a las indemnisaziuns da la confederaziun, han las incumbensas en
il sectur d'asil pudì vegnir ademplidas fin ussa uschia, ch'ellas han
cuvrì ils custs.
La regenza pretenda ch'il princip da la proporziunalitad vegnia
resguardà per il program d'acziun "Via sicura" da la confederaziun
La regenza grischuna sustegna da princip il program d'acziun "Via
sicura" ch'è vegnì planisà da la confederaziun. Quest program ha la
finamira da reducir il dumber da persunas mazzadas e blessadas sin las
vias svizras. La regenza pretenda dentant a medem temp da resguardar il
princip da la proporziunalitad en connex cun la realisaziun da las var
60 mesiras singulas proponidas che duain meglierar la segirezza dal
traffic.
Sco quai che la regenza scriva en sia resposta da consultaziun, è il
catalog da mesiras proponì fitg voluminus e fitg dimensiunà. La gronda
part da las propostas che vegnan messas en discussiun vegn beneventada
sut l'aspect da la segirezza dal traffic. Igl exista dentant il privel
ch'i vegnian fixadas novas reglas che pudessan vegnir controlladas
respectivamain realisadas mo cun gronda lavur administrativa
supplementara.p.ex. Perquai vali da mantegnair la buna mesira e da
preferir quellas mesiras che cuntanschan in effect evident cun custs
giustifitgabels.
Il princip da la proporziunalitad sto medemamain vegnir resguardà,
sch'i sa tracta da fixar e da prender mesiras architectonicas. En mintga
cas sto la cumpetenza e la responsabladad vertenta dals chantuns vegnir
respectada en quai che reguarda il stadi e la concepziun da lur raits da
vias. La finala refusa la regenza la proposta da destinar parzialmain
las multas da traffic a la finanziaziun da las mesiras.
Las novas regulaziuns da la protecziun da datas per utilisar
l'infrastructura electronica da la confederaziun vegnan messas en
dumonda
La regenza grischuna beneventa da princip che l'elavuraziun da datas
en connex cun l'utilisaziun da l'infrastructura electronica da la
confederaziun duai vegnir reglada sin il stgalim da la lescha. Quai
scriva ella en sia resposta da consultaziun davart la revisiun planisada
da la lescha federala davart l'organisaziun da la regenza e da
l'administraziun. La revisiun regla il tractament da datas che resultan
tras l'utilisaziun da l'infrastructura electronica da la confederaziun -
sco telefons, computers, controllas d'access, registraziuns da maletgs -
e che pudessan esser spezialmain degnas da vegnir protegidas.
La regenza refusa dentant la concepziun concreta dal project per
differents motivs. Sco problematic considerescha ella il fatg ch'ils
organs federals dastgan - tenor il sboz - da princip registrar tut las
datas che resultan tras l'utilisaziun da l'infrastructura electronica da
la confederaziun. Pir la suandanta elavuraziun da datas duai alura
vegnir restrenschida a tscherts intents. Renviond a la lescha davart la
protecziun da datas s'exprima la regenza cunter la collecziun da datas
da persunas sin "reserva" e pretenda che las autoritads dastgian
registrar e memorisar mo quellas datas ch'ellas dovran objectivamain per
ademplir lur incumbensa.
Contribuziuns chantunalas a differentas instituziuns
Pendicularas Motta Naluns: Cun resalva da la finanziaziun totala
vegn concedida a las Pendicularas Motta Naluns Scuol-Ftan-Sent SA - en
il rom da la nova politica regiunala - in emprest da 2'000'000 francs
per construir la telecabina dad 8 Scuol - Motta Naluns. Plinavant vegn
garantida ina contribuziun chantunala da 336'679 francs per il project.
Projects da vias
La regenza ha approvà totalmain 2'411'000 francs per construir e per
sanar ils suandants trajects da vias:
- via naziunala A13: lavurs d'impressari, galaria dal guaud
da Cassana
- via naziunala A28: lavurs sanitaras, sviament da Saas
- via sursilvana: lavurs da cuvrida, Laax - Schluein
- via da Riein: lavurs da cuvrida Raclein - Riein
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun