Navigation

Inhaltsbereich

  • Erste Mitteilung
  • Neuen Beitrag einfügen
Cun differentas mesiras novas vul il chantun Grischun distgargiar las pajataglias ed ils pajataglias, contribuir ad ina auta quota d'investiziun e gidar a stabilisar la situaziun economica. Tut las pajataglias e tut ils pajataglias pon profitar da la gulivaziun da la progressiun fraida per l'onn 2010. Plinavant propona la regenza distgargias tar la taglia sin la facultad ed ina reducziun da la taglia sin il gudogn per interpresas. A medem temp vegn augmentada la deducziun per ils custs da la tgira d'uffants ordaifer la famiglia. Ultra da quai vegn la lescha chantunala da taglia adattada en differents puncts al dretg fiscal federal armonisà. La regenza ha deliberà la missiva correspundenta tar la revisiun parziala da la lescha da taglia. Il cussegl grond vegn a tractar questa fatschenta en la sessiun da zercladur.

La revisiun parziala da la lescha chantunala da taglia che vegn proponida po vegnir considerada sco ulteriura mesira per stimular la conjunctura. A medem temp vegnan realisads ils puncts centrals da svilup dal program da la regenza 2009-2012 che duain meglierar la situaziun dal chantun Grischun sco lieu d'abitar e sco plazza economica. Ultra da differentas mesiras duai - er cun agid da distgargias fiscalas per las persunas natiralas e giuridicas - vegnir empruvà da stabilisar il consum da las persunas natiralas e da distgargiar l'economia d'export ch'è tutgada spezialmain fitg da la crisa economica. Cun meglierar en moda durabla las cundiziuns generalas fiscalas poi vegnir cuntanschì che la confidenza en il Grischun sco lieu d'investiziun vegn rinforzada e ch'i vegn er puspè investì en il Grischun, en cas che la conjunctura prosperescha puspè. Plinavant profiteschan interpresas indigenas er oz gia da questas mesiras en il Grischun. Ils puncts da revisiun che vegnan proponids ussa cumpletteschan las mesiras ch'èn vegnidas concludidas gia pli baud, sco la distgargia da conjugals e da famiglias cun uffants u la reducziun da taglia ch'è vegnida messa en vigur per il 1. da schaner 2008. Questas mesiras s'effectueschan gist il dretg mument ed augmentan la capacitad da cumpra da bleras pajataglias e da blers pajataglias.
A medem temp sco la revisiun parziala da la lescha da taglia propona la regenza ina gulivaziun pli svelta da la progressiun fraida. Da questa mesira profiteschan tut las pajataglias e tut ils pajataglias, cunquai che entradas pli autas, ch'èn mo il resultat da la chareschia, n'han betg pli per consequenza ina grevezza fiscala procentualmain pli auta. Plinavant vegnan proponidas distgargias tar la taglia sin la facultad, d'ina vart cun augmentar ils imports libers da taglia, da l'autra vart cun reducir la grevezza maximala. Questas mesiras han l'intent da render pli attractiv il Grischun sco lieu da domicil per pajataglias bainstants. Profitar duain er las famiglias. La regenza vul augmentar la deducziun per ils custs da la tgira d'uffants ordaifer la famiglia a 10'000 francs per uschia tegnair meglier quint dal svilup da la societad.

Distgargia da las interpresas
In ulteriur punct da la revisiun prevesa da sbassar la grevezza fiscala d'interpresas cun reducir la taglia sin il gudogn. Per quest intent duai la taglia sin il gudogn vegnir reducida dad actualmain 7 pertschient a 5.5 pertschient. En cumparegliaziun cun ses chantuns vischins resta il Grischun uschia cumpetitiv per ils investiders. Tras questa bassa tariffa da taglia sin il gudogn duai a medem temp er vegnir prendì cumià da la tariffa da taglia progressiva vertenta e vegnir midà ad ina tariffa da taglia proporziunala, l'uschenumnada "flat rate".

Adattaziuns a la refurma da la taglia sin interpresas II da la confederaziun
Ina part principala dal project è er l'adattaziun da la legislaziun chantunala al dretg federal. En il center stat qua la refurma da la taglia sin interpresas II. Questa revisiun, ch'è vegnida enconuschenta sco refurma da las interpresas pitschnas e mesaunas (IPM), è vegnida acceptada dal suveran il favrer 2008. Ils puncts principals èn la suspensiun dal mument d'imponer taglias en cas da prelevaziuns privatas, da partiziuns d'ierta u da l'affittaziun d'ina interpresa, l'imposiziun privilegiada sin ils gudogns da liquidaziun u l'extensiun da la deducziun per participaziuns tar las persunas giuridicas. Ulteriuras midadas en il dretg federal concernan per exempel l'amnestia d'ierta e la denunzia da sasez nunchastiabla sco er la procedura da taglia supplementara e da taglia penala.
E la finala vul il chantun stgaffir ina regulaziun legala, per che l'administraziun chantunala da taglia possia prestar servetschs d'incasso per il maun public.

Retgavs pli pitschens en l'autezza da var 39 milliuns francs
Las mesiras proponidas chaschunan a lunga vista entradas pli pitschnas da mintgamai circa 27 milliuns francs per il chantun e per las vischnancas. 12.5 milliuns francs importan las distgargias planisadas tar la taglia sin la facultad, 11 milliuns francs la reducziun da la taglia sin il gudogn. Perditas da rendita supplementaras en l'autezza da var 12 milliuns francs èn la consequenza dal fatg che la progressiun fraida vegn gulivada pli svelt. Questas perditas da rendita vul il chantun finanziar en emprima lingia tras l'agen chapital che stat a disposiziun. Cun questa revisiun che vegn proponida ussa è la libertad d'agir finanziala exaurida tenor l'avis da la regenza. Pretensiuns supplementaras ston vegnir spustadas sin pli tard.

Infurmaziuns:
- cusseglier guvernativ dr. Martin Schmid, schef dal departament da finanzas e vischnancas, tel. 081 257 32 01
- Urs Hartmann, manader da l'administraziun da taglia, tel. 081 257 33 24

Gremi: regenza
Funtauna: rg chanzlia chantunala dal Grischun
Neuer Artikel