Navigation

Inhaltsbereich

  • Erste Mitteilung
  • Neuen Beitrag einfügen
Il chantun Grischun duai sa participar a la cunvegna interchantunala davart la collavuraziun en il sectur da la pedagogia speziala (concordat da la pedagogia speziala). Quai propona la regenza grischuna. Ella ha deliberà la missiva correspundenta per mauns dal cussegl grond. Il parlament vegn a tractar questa fatschenta en la sessiun da zercladur.
La participaziun al concordat da la pedagogia speziala oblighescha ils chantuns da collavurar en quest sectur. En spezial fixeschan ils chantuns la purschida da basa che garantescha la furmaziun e l'assistenza d'uffants e da giuvenils che han in basegn da furmaziun spezial. Plinavant promovan els l'integraziun da quests uffants e da quests giuvenils en la scola regulara. En quest connex menziuna il concordat, ch'i stoppian vegnir preferidas soluziuns integrativas a soluziuns separadas, tegnend quint dal bainstar e da las pussaivladads da svilup da l'uffant sco er resguardond ils conturns da la scola e l'organisaziun da la scola. Tar las purschidas da basa ch'il concordat prescriva tutgan la cussegliaziun ed il sustegn, l'educaziun prescolara pedagogic-curativa, la logopedia sco er la terapia da psicomotorica. Ultra da quai regla il concordat las mesiras rinforzadas en las structuras dal di u la collocaziun staziunara en ina instituziun da la pedagogia speziala.
Il concordat da la pedagogia speziala stat en in connex direct cun la nova concepziun da la gulivaziun da finanzas e da la repartiziun da las incumbensas tranter la confederaziun ed ils chantuns (NGF) ch'è vegnida concludida l'onn 2004. Cun la NGF è l'entira responsabladad professiunala, legala e finanziala per la scolaziun speziala d'uffants e da giuvenils a partir da la naschientscha fin a la cumplenida dal 20avel onn da vegliadetgna vegnida transferida il 1. da schaner 2008 sin ils chantuns. Uschia è vegnida stgaffida per ils chantuns ina libertad da decider. Quella, ma er la responsabladad ch'ils chantuns ston surpigliar da nov èn ina schanza ed a medem temp ina sfida per els.
Per dumagnar questa nova sfida uschia, ch'i vegn garantida ina coordinaziun adequata tranter ils chantuns - er en l'interess dals uffants pertutgads - ha la conferenza svizra da las directuras e dals directurs chantunals da l'educaziun publica (CDEP) elavurà il concordat da la pedagogia speziala. Ultra da las finamiras principalas prevesa la cunvegna er l'applicaziun d'instruments e da proceduras cuminaivlas. Ils instruments "terminologia unifitgada" e "standards da qualitad" èn avant maun. Elavurada vegn ina procedura da scleriment standardisada per eruir ils basegns individuals.
En il chantun vegnan instruids actualmain circa 400 scolaras e scolars da la scola speziala en moda interna, en moda externa u en moda integrada. Cun il concept grischun da pedagogia speziala (concept per la scola speziala) dal mars 2007 e cun la participaziun al concordat da la pedagogia speziala è il Grischun - tenor la persvasiun da la regenza - preparà bain per dumagnar la fasa transitorica dals onns 2008 - 2011 ch'è determinada da la constituziun federala en consequenza da la NGF tranter la confederaziun ed ils chantuns. Il chantun è uschia er preparà bain per dumagnar las sfidas posteriuras e per surpigliar la responsabladad en il sectur da la scolaziun speziala.

Infurmaziuns:
Dany Bazzell, manader da l'uffizi per la scola populara ed il sport, tel 081 257 27 50

Gremi: regenza
Funtauna: rg chanzlia chantunala dal Grischun
Neuer Artikel