Il plan directiv "abitaziuns secundaras ed alloschament turistic" sco er il "instrumentari per las vischnancas" vegnan exponids publicamain dals 9 d'avrigl 2009 fin ils 11 da matg 2009. Ils documents stattan a disposiziun sut www.are.gr.ch.

Mez schaner 2009 aveva il departament d'economia publica e fatgs socials, ensemen cun l'uffizi per il svilup dal territori, orientà la publicitad sco er las vischnancas e las regiuns pertutgadas davart il plan directiv "abitaziuns secundaras ed alloschament turistic" e davart l'instrumentari per las vischnancas. En il fratemp è vegnida fatga ina preconsultaziun facultativa davart il plan directiv tar las vischnancas e tar las regiuns pertutgadas. Las respostas èn vegnidas resguardadas uschè bain sco pussaivel. Il plan directiv rectifitgà vegn exponì publicamain. Durant l'exposiziun dals plans po mintgina e mintgin far propostas ed objecziuns che concernan l'adattaziun previsa dal plan directiv. Dal project pon ins prender invista sut www.are.gr.ch . Da qua po el er vegnir chargià giu. Er da l'instrumentari (stadi da l'exposiziun dal plan directiv) sco basa pon ins prender invista.

Sin basa da las posiziuns ch'èn entradas en il rom da la preconsultaziun poi vegnir constatà ch'i vegn beneventà generalmain ch'il chantun daventa activ en questa tematica. Intginas precisaziuns e concretisaziuns èn vegnidas giavischadas. Sco spetgà èsi vegnì rendì attent a differents cas spezials sco er a particularitads surlocalas e localas ch'il plan directiv chantunal stuess resguardar.

Cumpareglià cun il project dal schaner 2009 è il plan directiv vegnì adattà en ils suandants 5 puncts impurtants:
1. prolungà il termin per las vischnancas per prender mesiras per in onn fin 2012; fixà in termin per las regiuns (2011);
2. differenzià vischnancas che han in basegn d'agir cumprovà da vischnancas, da las qualas il basegn d'agir sto mo "vegnir examinà"; quest ultim sin giavisch da las regiuns ed en concordanza cun la planisaziun directiva regiunala;
- 35 vischnancas han in basegn d'agir cumprovà;
- 21 vischnancas ston l'emprim cooperar tar la planisaziun directiva regiunala ed han - or da l'optica dal chantun - in basegn d'agir che sto vegnir examinà;
3. concretisà las finamiras dal plan directiv en las explicaziuns; il cuntegn n'è betg vegnì midà;
4. concretisà (e differenzià) las incumbensas da las regiuns / planisaziun regiunala;
5. furmà ina categoria "abitaziuns secundaras explotadas sin basa privata" sin il giavisch explicit da bleras regiuns e vischnancas, dentant cun il cler renviament che questa categoria na vegnia strusch ad esser controllabla da las autoritads da construcziun.

Igl èn er vegnids concretisads e precisads in pèr detagls pitschens, dentant impurtants:
1. decleraziuns specificas per vischnancas fusiunadas en reguard al prinzip "almain trais abitaziuns secundaras betg explotadas";
2. decleraziuns specificas per vischnancas che han gia ina soluziun cun contingents: quellas na duain betg vegnir "chastiadas" en cas che la limitaziun ad in terz da la producziun vertenta d'abitaziuns secundaras, ch'è previsa, vegniss realisada;
3. accordà la noziun "resort / residenza turistica" cun l'instrumentari e fatg ch'ella è "orientada a la pratica" resp. "favuraivla per las utilisadras e per ils utilisaders".
La finamira, tenor la quala la construcziun d'abitaziuns secundaras duai vegnir limitada ad in terz da la producziun vertenta (cun excepziun d'abitaziuns secundaras explotadas) e tenor la quala abitaziuns secundaras betg explotadas duain vegnir exclusas en cas che novas zonas da construcziun d'abitadi vegnan zavradas, vegn mantegnida.

Infurmaziuns
- Carlo Decurtins, giurist per la planisaziun dal territori, departament d'economia publica e fatgs socials, tel. 081 257 23 14
- Richard Atzmüller, partiziun "planisaziun directiva", uffizi per il svilup dal territori,
tel. 081 257 23 37

Gremi: departament d'economia publica e fatgs socials
Funtauna: rg departament d'economia publica e fatgs socials