Las quantitads da naiv da quest enviern ch'èn pli grondas che usità chaschunan cun las temperaturas da primavaira actualas situaziuns criticas en blers lieus da la rait da vias dal Grischun. Ils proxims dis e las proximas emnas ston ins vinavant far quint en regiuns pli autas – tut tenor las temperaturas – cun bloccadas localas da la via.

Tenor las mesiraziuns da l'institut per la perscrutaziun da naiv e lavinas a Tavau hai quest onn en las muntognas ed uschia er en il sectur da la rait da vias dal Grischun che sa chatta en regiuns pli autas var duas giadas tanta naiv cumpareglià cun la media da blers onns. L'irradiaziun creschenta dal sulegl la primavaira chaschuna instabilitads en la cuverta da naiv ed uschia squatschs da naiv bletscha u schizunt lavinas da naiv bletscha tar costas spundivas. Il pli privlus èsi suenter notgs pli miaivlas, sche la naiv ch'è vegnida lomiada il di avant, na schela betg pli e vegn puspè stgaudada en il decurs dal di.

Questa primavaira vegnan las costas criticas observadas cun fitg gronda attenziun da las collavuraturas e dals collavuraturs da l'uffizi da construcziun bassa. Sche la cumissiun da lavinas responsabla al lieu sa decida da serrar in traject d'ina via, sco che quai è capità differentas giadas las emnas passadas, vegn quai fatg pir suenter ch'ella ha ponderà premurusamain las differentas cundiziuns generalas. En l'Engiadina bassa vegnan per exempel observads 30 laviners enconuschents, sin il pass dal Fuorn 6 laviners. Fitg impurtants per las decisiuns da las expertas e dals experts a la front èn las infurmaziuns ed ils bulletins da lavinas da l'institut federal per la perscrutaziun da naiv e lavinas SLF a Tavau. Las quantitads da naiv ch'èn pli grondas che usità e che han per part chaschunà squatschs er tar costas che valevan fin ussa sco nunprivlusas fan ch'igl è pli grev quest onn da giuditgar la segirezza da las vias.

En cas da mintga decisiun da l'uffizi da construcziun bassa da serrar ina via vegn messa en il center la protecziun da la vita umana. Ponderaziuns economicas, custs supplementars che vegnan chaschunads da viadis pli lungs u temps da spetga pli lungs èn da segunda prioritad en questas situaziuns. L'uffizi da construcziun bassa supplitgescha la populaziun d'avair encletga per las mesiras che vegnan savens resguardadas sco nunpopularas. El drizza in appel a las persunas che utiliseschan las vias en regiuns pli autas d'observar strictamain las ordinaziuns respectivas da la polizia chantunala e da l'uffizi da construcziun bassa sco er da charrar sezzas cun la precauziun duida. Ina protecziun absoluta cunter squatschs spontans u lavinas da naiv bletscha spontanas na datti displaschaivlamain betg. Ina tscherta ristga resta adina.

Infurmaziuns actualas davart bloccadas da la via chattais Vus sut www.strassen.gr.ch

Infurmaziuns:
- Peter Stirnimann, responsabel per las medias, 081 257 37 11 / 079 291 72 75
- Reto Knuchel, schef dal mantegniment da vias/districts da l'uffizi da construcziun bassa, 081 257 37 35 / 079 629 81 14

Gremi: uffizi da construcziun bassa
Funtauna: rg uffizi da construcziun bassa