En il rom da la sanaziun totala da la scola chantunala grischuna a Cuira è previsa in'ulteriura etappa da sanaziun. Suenter la renovaziun dals stabiliments da scola sin l'areal Halde duai er l'edifizi Cleric al Plessurquai vegnir sanà en moda cumplessiva. Quai propona la regenza grischuna. Ella ha deliberà la missiva correspundenta per mauns dal cussegl grond e propona al parlament da conceder in credit d'impegn da 26 milliuns francs. Il cussegl grond vegn a tractar questa fatschenta en la sessiun da zercladur.

Il concept per sanar la chasa Cleric (l'anteriur seminari da magistras e da magisters) fa part dal project general "Sanaziun architectonica da la scola chantunala grischuna a Cuira". Gia il zercladur 2006 aveva il cussegl grond approvà la sanaziun architectonica dals edifizis da scola sin l'areal Halde a Cuira ed aveva concedì in credit d'impegn da 50 milliuns francs per quest intent. Il fanadur 2007 han ins cumenzà cun las lavurs. Il tract da classas vegn surdà a la scola il fanadur 2009. Suenter vegn sanà architectonicamain il tract da las scienzas natiralas. Er quel po puspè vegnir mess en funcziun in onn pli tard. Durant la sanaziun sin l'areal Halde vegnan a cumenzar las lavurs da construcziun vi da la colliaziun dals dus areals Plessur e Halde. Per quest intent aveva il cussegl grond concedì in credit da 5.8 milliuns francs.
In'ulteriura etappa impurtanta dal concept general è ussa er la renovaziun da la chasa Cleric al Plessurquai. L'edifizi ch'è vegnì construì ils onns 1962 fin 1964 sto vegnir sanà. Ils mirs exteriurs da l'edifizi n'adempleschan tranter auter betg pli las pretensiuns areguard l'isolaziun termica respectivamain las pretensiuns da la legislaziun chantunala d'energia. La sanaziun da la fatschada externa, dal tetg e da las fanestras ch'è planisada duai gidar ad ademplir las prescripziuns dal standard da MINERGIE. Plinavant èsi previs d'installar sin il tetg dal tract da classas in indriz fotovoltaic cun ina prestaziun da circa 20 kilowatt. Ultra da quai èn las chavas stuccadas cun pasta da stuppadira ch'è contaminada cun PCB. Quella pasta sto vegnir allontanada e dismessa en moda professiunala. Plinavant ston vegnir renovads ils indrizs da la tecnica da chasa sco il stgaudament e la ventilaziun sco er las installaziuns sanitaras. Ils custs per sanar l'edifizi Cleric en moda cumplessiva importan totalmain 26 milliuns francs.
Tenor la regenza è la sanaziun in ulteriur element impurtant en il rom da la renovaziun totala currenta da la scola chantunala grischuna. Il project persvada areguard la qualitad ed areguard l'economia e garantescha che la scola chantunala s'etableschia en moda persistenta sco instituziun chantunala da furmaziun impurtanta. La parita exteriura da l'edifizi duai vegnir mantegnida. Cun quai duai vegnir tegnì quint dal conturn ch'è sensibel areguard l'urbanistica, a l'ur da la citad veglia, avant la culissa da S. Luzi e da la catedrala. Ultra da quai sa laschan eliminar tut ils obstachels architectonics. Quai pussibilitescha a las persunas cun impediments l'access illimità al stabiliment da scola en l'avegnir.
Las investiziuns principalas per la sanaziun da la chasa Cleric vegnan fatgas gia a partir da la stad 2010, immediatamain suenter che las lavurs vi da la scola chantunala sin l'areal Halde èn terminadas. Uschia cumbattan questas investiziuns - en il senn d'ina mesira per stabilir la conjunctura che po vegnir realisada directamain - las tendenzas da conjunctura negativas en il chantun.
Sch'il cussegl grond accepta il project, pon ins cumenzar cun las lavurs da sanaziun il fanadur 2010. Quellas duran probablamain fin la mesadad da l'onn 2012. Suenter la sanaziun da l'edifizi Cleric prevesa il concept general da realisar - en ina construcziun nova cumplementara sin l'areal Plessur - las localitads che mancan anc sco per exempel ina mensa, ina mediateca sco er ulteriurs locals d'instrucziun necessaris.

Infurmaziuns:
- cusseglier guvernativ Stefan Engler, schef dal departament da construcziun, traffic e selvicultura, tel. 081 257 36 01
- Markus Dünner, architect chantunal, uffizi da construcziun auta dal Grischun,
tel. 081 257 36 31

Gremi: regenza
Funtauna: rg chanzlia chantunala dal Grischun