La regenza grischuna ha deliberà la missiva davart la terza ed
ultima etappa da l'introducziun da la nova gestiun publica GRiforma. En
quella vegnan descrittas la structura da las gruppas da products ed ils
effects dals ultims 12 posts da servetsch che midan a GRiforma. Il
cussegl grond vegn a tractar questa fatschenta durant la sessiun da
zercladur 2009.
L'october 2006 aveva il cussegl grond concludì d'introducir en
etappas la nova gestiun publica tenor ils princips da GRiforma, e quai
en tut l'administraziun chantunala. En in'emprima etappa han 18 posts da
servetsch introducì GRiforma per il 1. da schaner 2008. Il 1. da schaner
2009 - en la segunda etappa - han alura 9 ulteriurs posts da servetsch
realisà la refurma. En ina terza ed ultima etappa vegnan ils 12 posts da
servetsch restants a cumenzar cun la nova gestiun publica a partir dal
1. da schaner 2010.
La missiva cuntegna infurmaziuns detagliadas davart la structura da
las gruppas da products e davart l'effect politic che duai vegnir
cuntanschì tar mintga gruppa da products dals singuls posts da
servetsch. Questas gruppas da products e quests effects ston vegnir
concludids dal cussegl grond. En quest connex è la structura da las
gruppas da products impurtanta tant enavant, ch'il cussegl grond
fixescha en l'avegnir ils preventivs globals sin questa basa. Cun
formular l'effect determinescha il parlament ultra da quai la direcziun,
en la quala las prestaziuns da l'administraziun duain ir.
Gremi: regenza
Funtauna: rg chanzlia chantunala dal Grischun