La regenza grischuna ha gratulà a l'architect Peter Zumthor, ch'è vegnì undrà cun il premi Pritzker per architectura 2009. Cun grond plaschair ha la regenza prendì enconuschientscha da questa distincziun impurtanta, sco ch'ella scriva al premià en ina brev da gratulaziun.
Questa distincziun meritada è vegnida deditgada ad in architect che ha concentrà l'emprim sia lavur e sias ovras sin il Grischun, che ha dentant cuntanschì en il fratemp renum mundial e renconuschientscha internaziunala. Betg mo la terma a Val S. Pieder, mabain numerusas autras ovras architectonicas impurtantas entaifer ed ordaifer il Grischun valan oz sco vairs capodovras da la cultura architectonica contemporana. La regenza è fitg ventiraivla che Peter Zumthor è restà fidaivel al chantun Grischun. Betg sco ultim valia er ses biro d'architectura a Haldenstein en il fratemp sco veritabla instituziun che promova architectas ed architects grischuns giuvens e che giauda in'attracziun naziunala ed internaziunala, hai num en la brev. A questa ovra da vita, che ha chattà sia appreziaziun meritada tras questa distincziun impurtanta, vala il respect e la stima da la regenza.

Gremi: regenza
Funtauna: rg chanzlia chantunala dal Grischun