Navigation

Inhaltsbereich

  • Erste Mitteilung
  • Neuen Beitrag einfügen
L'edifizi dal cussegl grond a Cuira survegn in nov access senza obstachels. Venderdi, ils 24 d'avrigl 2009, ha lieu l'emprima badigliada uffiziala per il project da construcziun.

Areguard l'access senza obstachels na correspunda l'entrada da l'edifizi dal cussegl grond a Cuira daditg betg pli a las pretensiuns che vegnan fatgas a l'edifizi il pli public dal chantun. Dapi la renovaziun da l'edifizi dal parlament l'onn 1993 ha la situaziun da l'entrada adina puspè procurà per discussiuns. Il muntastgalas, ch'è vegnì installà posteriuramain, è sa mussà pli tard sco soluziun nuncuntentaivla.

L'atun 2007 ha l'uffizi da construcziun auta dal Grischun organisà ina concurrenza da projects tranter otg biros d'architectura grischuns enconuschents. Il project excellent dal biro d'architectura Valerio Olgiati ha survegnì l'emprim premi e vegn ussa realisà.

En l'avegnir cuntanschan tut las visitadras e tut ils visitaders l'edifizi dal cussegl grond en moda simpla e natirala, sur in access cuminaivel ed equivalent - per umans cun e senza impediments. Trais elements defineschan il nov access: ina rampa sco sochel levamain inclinà, ina schiba arrundada sco element purtant ed in tetg che cuvra tut quai. Trais elements che adempleschan - tras lur cumbinaziun raffinada - en moda excellenta las pretensiuns funcziunalas, urbanisticas e concepziunalas che vegnan fatgas a quest edifizi impurtant.

La rampa dubla maina senza stgalims e senza obstachels da la plazza dal teater a l'entrada existenta. Ella surpiglia las proporziuns e las dimensiuns dal sochel da l'edifizi dal cussegl grond. Sin la schiba purtanta ch'è sturschida levamain vegn ballantschà il tetg massiv protegint. Il nov access è separà da l'edifizi dal cussegl grond tras ina chava satiglia, uschia che la substanza architectonica veglia na vegn betg tangada. Tut las parts architectonicas massivas vegnan culadas en betun che vegn preparà al lieu e che consista da cement alv, da sablun dal Giura e da gera da Cuira. Las surfatschas dal palantschieu vegnan muladas e tractadas cun il martè.

La sessiun da zercladur dal cussegl grond ha lieu ordaifer la chapitala, a Puschlav. Per las lavurs da construcziun pretensiusas stattan pia a disposiziun stgars 4 mais. Las lavurs da construcziun cumenzan suenter la sessiun d'avrigl dal cussegl grond. La finiziun da l'indriz è previsa per la fin da fanadur 2009. Al cumenzament da la sessiun d'avust ha lieu l'inauguraziun festiva da la nova entrada. I vegn fatg quint cun custs da construcziun da 670'000 francs.

Cun questas mesiras architectonicas vegni ad esser pussaivel en l'avegnir per tut las visitadras e per tut ils visitaders d'entrar senza obstachels en l'edifizi dal cussegl grond.

Infurmaziuns:
Markus Dünner, architect chantunal, uffizi da construcziun auta, tel. 081 257 36 31

Gremi: uffizi da construcziun auta
Funtauna: rg uffizi da construcziun auta
Neuer Artikel