Entant che las lavurs da sanaziun vi da la scola chantunala "Halde"
progredeschan, è vegnida fatga e decidida la concurrenza da planisaziun
per la sanaziun da la chasa Cleric (anteriur seminari da magistras e da
magisters) e per la colliaziun Plessur - Halde.Halde.
Ils onns 1962 fin 1964 è vegnì construì l'edifizi dal seminari da
magistras e da magisters sin il lieu da la villa Cleric al Plessurquai a
Cuira. Dapi che la scolaziun da las persunas d'instrucziun è vegnida
transferida l'onn 2003 en l'anteriura scola da dunnas sin l'areal dal
Kantengut occupa la scola chantunala questas localitads. Oz demussa la
chasa "Cleric" in basegn da sanaziun considerabel che correspunda a la
vegliadetgna da l'edifizi.
Per sanar quest edifizi en moda cumplessiva e persistenta ha il
chantun publitgà la primavaira 2008 - en la procedura da submissiun
selectiva - ina concurrenza che cumpiglia tut las prestaziuns. Suenter
avair repassà ils trais projects ch'èn vegnids inoltrads cun offertas da
pretschs liants ha il team che consista da HRS Real Estate SA, da Pablo
Horvàth, architect SIA SWB, da Widmer, Krause + partenaris SA,
inschigners da construcziun, da Marquart planisaziuns electricas SA, da
Kalberer + partenaris SA, planisaziuns SVCF, da Marco Felix SA,
planisaziuns sanitaras e da Feroplan Engineering SA, planisaziun da
fatschadas, tuttas e tuts da Cuira, survegnì l'agiudicaziun per ses
project "Monument". Questa purschida ademplescha en moda optimala ils
criteris ch'èn vegnids applitgads areguard la rentabilitad/persistenza,
areguard la concepziun/construcziun, areguard l'utilisaziun, areguard
l'avertura, areguard il clima da lavur, areguard la sanadad sco er
areguard l'ambient. La perditga architectonica impurtanta dals onns 1960
da l'architect Andres Liesch na vegn betg midada en ses aspect exteriur,
schebain ch'ella vegn sanada energeticamain ed ademplescha suenter il
standard da minergia. En la sessiun da zercladur vegn il project da
sanaziun suttamess al cussegl grond per l'approvaziun. Ils custs
correspundents importan tut en tut 26 milliuns francs.
La colliaziun da la scola chantunala "Plessur" (chasa Cleric e
stabiliment da sport "Sand") cun la scola chantunala "Halde" sur la St.
Luzistrasse è privlusa per pedunas e per peduns, dovra bler temp e n'è
betg adattada per persunas cun impediments. Per colliar meglier quests
dus lieus da scola ha il cussegl grond deliberà ils 4 da december 2007
in credit da 5.8 milliuns francs per realisar ina colliaziun da quests
dus lieus ch'è adattada per persunas cun impediments e che n'è betg
privlusa.
Per questa incumbensa da construcziun è vegnida publitgada ina
concurrenza da planisaziun selectiva da dus pass. L'incumbensa da la
concurrenza è stada quella d'elavurar soluziuns per la colliaziun sin
basa d'indicaziuns concepziunalas, constructivas e funcziunalas.
En ils egls da la giuria ha il project "san luca" ademplì il meglier
las premissas areguard la concepziun generala/urbanistica, areguard la
funcziunalitad, areguard la concepziun architectonica, areguard la
construcziun/la moda da bajegiar, areguard ils custs da construcziun e
da gestiun che pon vegnir spetgads, areguard la ristga ch'ils custs
vegnian surpassads, areguard l'andament da construcziun, areguard
l'organisaziun ed areguard ils termins. Il team da planisaziun
responsabel sa cumpona dad esch.sintzel, architects SPF SIA BSA, Turitg,
da Zoanni architects, manaschament da construcziun, Cuira, da dr.
Lüchinger + Meyer, inschigners da construcziun SA, Turitg e da Luzius
Saurer, architect da cuntrada STS/FSAC, Hinterkappelen.
Tut ils projects da questa concurrenza vegnan exponids publicamain
la gievgia, ils 7 da matg, e venderdi, ils 8 da matg, sco er da
glindesdi, ils 11 da matg, fin venderdi, ils 15 da matg 2009, mintgamai
da las 8.00 fin a las 19.00 en il plaunterren da la chasa da scola
Cleric, Plessurquai 63, Cuira.
Detagls davart la concurrenza da projects e las infurmaziuns davart
ils resultats pon vegnir chargiads giu da la pagina d'internet
www.kanti.gr.ch .
Infurmaziuns:
Markus Dünner, architect chantunal, uffizi da construcziun auta dal
Grischun, telefon 081 257 36 31
Gremi: uffizi da construcziun auta
Funtauna: rg uffizi da construcziun auta