Sut il presidi da la deputada Susanne Krättli-Lori ha la cumissiun dal cussegl grond per furmaziun e cultura (CFC) predeliberà per mauns dal cussegl grond la missiva da la regenza tar las duas iniziativas dal pievel "iniziativa.d'etica" e "Scola professiunala da tgira dal Grischun a Glion". A la sesida da la cumissiun è sa participà er il cusseglier guvernativ Claudio Lardi. Ultra da quai ha la cumissiun tadlà ils represchentants dals dus comités d'iniziativa.

"iniziativa.d'etica"
Questa iniziativa prevesa d'introducir l'instrucziun obligatorica d'etica en la scola populara. Tenor il comité d'iniziativa na correspunda l'instrucziun da religiun en la scola populara betg pli al temp dad oz. Cun l'instrucziun d'etica duai vegnir creà in rom, en il qual las scolaras ed ils scolars da tut las religiuns ed er talas e tals, che n'appartegnan betg ad ina religiun, tractan ensemen dumondas fundamentalas da la convivenza.
La regenza refusa l'iniziativa e suttametta al pievel ina cuntraproposta. Il cuntegn da la cuntraproposta è vegnì elavurà d'ina gruppa da lavur interconfessiunala, en la quala è stà represchentà er il departament d'educaziun. Questa cuntraproposta vegn designada sco uschenumnà "model 1+1". Quest model prevesa ina lecziun "enconuschientscha da las religiuns ed etica" per emna ch'è obligatorica per tuttas e per tuts ed ina lecziun da religiun per emna per tut las commembras e per tut ils commembers da las baselgias chantunalas.

Suenter avair tractà intensivamain il project ha la cumissiun concludì unanimamain da recumandar al cussegl grond da refusar la "iniziativa.d'etica". Cun set cunter ina vusch recumonda ella dentant d'acceptar la cuntraproposta.

Scola professiunala da tgira dal Grischun a Glion (SPTG)
Suenter che la SPTG n'ha betg retschavì in'incarica da prestaziun da la regenza l'onn 2006 per instituir ina scola professiunala superiura da tgira, duai la regenza - cun agid da questa iniziativa - vegnir obligada tras la lescha da mantegnair er en l'avegnir a Glion il lieu da scolaziun e da furmaziun supplementara en il sectur da sanadad, en spezial la scola professiunala da tgira dal Grischun. L'iniziativa vegn motivada cun la dumonda per persunal da tgira qualifitgà che crescha ad in crescher, cun l'enragischament da la scola en la Surselva sco er cun ponderaziuns da la politica regiunala. Ultra da quai renvieschan las iniziantas ed ils iniziants a la purschida excellenta da furmaziun e da scolaziun da la scola. Questa purschida giaudia ina gronda reputaziun sur ils cunfins dal chantun or.
Sco la regenza scriva en sia missiva, insista ella sin il fatg che la basa da recrutaziun en las regiuns saja memia pitschna per pudair manar ulteriuras scolas professiunalas spezialisadas. Sin basa dals scleriments ch'èn vegnids fatgs, ha la regenza constatà concretamain ch'i na dettia oz nagin basegn en il chantun per ina segunda scola professiunala superiura da tgira, sco quai ch'i vegn pretendì da l'iniziativa. En cas che l'iniziativa vegniss acceptada, stuess vegnir stgaffida ina regulaziun legala areguard la SPTG, che prevesess la renconuschientscha da la scola sin basa dal dretg da survegnir contribuziuns, senza che quella stuess cumprovar il basegn per contribuziuns.

Suenter avair examinà ils arguments d'omaduas varts, suonda la cumissiun per furmaziun e cultura la regenza cun sis cunter duas vuschs e recumonda da refusar l'iniziativa.

Il cussegl grond vegn a s'occupar dals projects durant la sessiun da favrer 2009 e vegn alura a dar a las votantas ed als votants ina recumandaziun per la votaziun.

Gremi: cumissiun per furmaziun e cultura
Funtauna: rg cumissiun per furmaziun e cultura