La promoziun da la cultura dal chantun Grischun ha lantschà il
cumenzament da quest onn ina concurrenza per sviluppar projects e per
promover scenaris da films documentars e da films dramatics rumantschs.
La fin d'avrigl èn vegnidas deliberadas las emprimas contribuziuns. Per
totalmain tschintg projects da films èn vegnids surdads 77'000 francs.
Da mez mars fin mez avrigl han la commembra ed ils commembers da la
cumissiun gì l'occasiun da giuditgar ils otg projects ch'èn vegnids
inoltrads. Las dumondas ch'èn vegnidas inoltradas da las cineastas e
dals cineasts èn vegnidas examinadas da la cumissiun da concurrenza, che
consista dad Esther Krättli Jenny, commembra da la cumissiun per
promover la cultura, da Peter Egloff, publicist ed anteriur manader da
program da la televisiun rumantscha e dad Armon Fontana, uffizi da
cultura, partiziun "promoziun da la cultura", areguard lur qualitad ed
areguard lur professiunalitad.
L'uffizi federal da cultura, secziun "film", e l'uffizi da cultura
dal chantun Grischun, partiziun "promoziun da la cultura", mettan a
disposiziun ina summa da totalmain 100'000 per onn per la promoziun per
ils onns 2009 e 2010. Quest onn èn vegnids deliberads en tut 77'000
francs per ils suandants tschintg projects:
- Susanna Fanzun
Senza sturnizi - Richard Coray, il constructur da punts
persas, film documentar
- Manfred Ferrari
La segunda vita da Hans Jösler, film dramatic
- Claudia Knapp
La princessa da Samedan - Norina Gilli - Maria Carmi -
Princess Matchabelli, drama documentar
- Gieri Venzin
Chant rumantsch fa pel-giaglina, film documentar
- Ivo Zen & Jean Claude Cantieni
L'homin sulvedi, film d'animaziun
Project da pilot per dus onns
Al project da pilot ch'è limità per entant a dus onns sa
participeschan l'uffizi federal da cultura ed il chantun Grischun. En
vista da la situaziun difficila da la cinematografia rumantscha
independenta è la finamira quella da meglierar las cundiziuns generalas
per tala. A medem temp è questa concurrenza da film ina contribuziun a
la diversitad linguistica. Talas pussaivladads da promover il film
existan gia en la Svizra franzosa e taliana. Las petentas ed ils petents
ston esser cineastas e cineasts independents e ston ademplir las
premissas generalas da la lescha federala davart ils films.
Infurmaziuns:
Armon Fontana, promoziun da la cultura dal Grischun, Loëstrasse 26,
7001 Cuira, tel. 081 254 16 02, e-mail:
armon.fontana@afk.gr.ch.
Gremi: uffizi da cultura
Funtauna: rg uffizi da cultura