La cumissiun dal cussegl grond per sanadad e fatgs socials (CSF) ha fatg dacurt ina visita da lavur al "Center da sandà Engiadina Bassa (CSEB)". Suenter ina sesida da la CSF en atgna chaussa è ella vegnida beneventada da signur Victor Peer (president dal cussegl da fundaziun dal CSEB) e da Philipp Gunzinger (mainagestiun) en il center da sanadad d'Engiadina bassa. Ultra d'ina introducziun en l'istorgia ed en il svilup da l'ospital da Scuol al center da sanadad actual d'Engiadina bassa, ha la cumissiun gì la pussaivladad da visitar las partiziuns da la medischina cumplementara e palliativa cun il guid dr. Hannes Graf.
La CSF è stada intgantada da l'organisaziun dal CSEB, da la purschida da prestaziuns da quel e da las pussaivladads che la medischina cumplementara e palliativa pon porscher a las pazientas ed als pazients. Tenor l'avis da la CSF n'ha il CSEB betg mo cumprovà che la medischina da scola e che la medischina cumplementara possian exister ina sper l'autra sut in tetg e ch'ellas possian sa cumplettar, mabain er, ch'il model d'in center da sanadad, en il qual èn integrads tranter auter l'ospital, ina partiziun per la tgira da lunga durada, la spitex ed il bogn Engiadina, è fitg prospectiv. Betg main remartgabla è en quest connex dentant er la circumstanza ch'il CSEB ha pudì s'etablir gist en ina regiun perifera dal Grischun.

Infurmaziuns:
Carlo Portner, cumissiun per sanadad e fatgs socials, tel. 081 253 66 55

Gremi: cumissiun per sanadad e fatgs socials
Funtauna: rg cumissiun per sanadad e fatgs socials