Vi dals custs da realisaziun dal parc natiral regiunal Beverin sa
participescha il chantun Grischun per ils onns 2009 fin 2011 cun 60
pertschient da la contribuziun federala, dentant cun maximalmain 230'000
francs per onn. Quai ha concludì la regenza grischuna. A medem temp
supplitgescha ella l'uffizi federal d'ambient da conceder ina
contribuziun federala dad 807'500 francs per ils onns 2009 fin 2011. Per
garantir la contribuziun chantunala restan resalvads ils agids
finanzials da la confederaziun.
Tenor l'avis da la regenza ademplescha il project dal parc natiral
regiunal d'impurtanza naziunala "parc Beverin" las premissas per la
concessiun d'agids finanzials generals. Il territori ch'è previs per il
parc Beverin ha valurs natiralas fitg grondas sco er ina zunt buna
qualitad da la cuntrada. La regenza è pronta da sustegnair quest project
ch'è fixà en il plan directiv, per l'ina pervia dal resun positiv en la
publicitad pertutgant ils projects currents "parc Ela" e "biosfera Val
Müstair" sco er per l'autra pervia dal bun posiziunament dal "parc
Beverin" en il senn d'ina cumplettaziun dals projects da parc vertents
en il Grischun. Igl è previs da cumenzar cun il manaschi dal "parc
Beverin" a partir da l'onn 2012.
Il medem mument ha la regenza er prendì enconuschientscha da la
dumonda repassada per in label per il parc natiral regiunal "biosfera
Val Müstair" ed ha tramess quella a la confederaziun. Ella propona a
l'uffizi federal d'ambient da conceder il label al parc. Tras la fusiun
da vischnancas en Val Müstair che ha survegnì vigur legala per il 1. da
schaner 2009, è ussa fixada l'instituziun ch'è responsabla per il parc
natiral regiunal. Tenor l'avis da la regenza è pia ademplida la premissa
per la concessiun dal label "parc natiral regiunal d'impurtanza
naziunala". Ultra da quai sustegna la regenza l'engrondiment dal
reservat da biosfera existent "Parc Suisse" (parc naziunal) al nov
reservat da biosfera "Val Müstair - parc naziunal". Ella supplitgescha
l'uffizi federal d'ambient d'inoltrar ils documents da nominaziun da la
UNESCO.
La regenza reparta la dieschma d'alcohol ad instituziuns
d'utilitad publica
La regenza ha repartì l'uschenumnada dieschma d'alcohol. I sa tracta
qua da daners che derivan da la taxaziun dal commerzi en detagl cun
bavrondas destilladas. La contribuziun che stat a disposiziun per
intents d'utilitad publica importa 561'000 francs sin basa dal resultat
da l'onn da gestiun 2008. Resguardadas vegnan ca. 30 organisaziuns ed
instituziuns caritativas sco er differents projects en il chantun.
Da vischnancas e da regiuns
Tschiertschen-Praden: La nova constituziun da la vischnanca da
Tschiertschen-Praden dals 12 da december 2008 vegn approvada.
Tavau: La regenza ha prendì enconuschientscha da la nova
denominaziun da la vischnanca fusiunada da "Tavau". La denominaziun da
las vischnancas fusiunadas dal circul da Tavau e da la vischnanca da
Wiesen sco "vischnanca da Tavau" è vegnida refusada da la confederaziun.
Sin quai ha il cussegl pitschen da la vischnanca da Tavau fatg la
dumonda da numnar la vischnanca fusiunada "Tavau".
Duin: La revisiun parziala da la planisaziun locala da la vischnanca
da Duin dals 27 d'october 2008 vegn approvada.
San Vittore: La revisiun parziala da la planisaziun locala da la
vischnanca da San Vittore dals 13 d'october 2008 vegn approvada.
Contribuziuns chantunalas a differentas instituziuns
Teater da Cuira: Per la segunda part da la stagiun 2008/2009
(atun/enviern 2008) survegn il teater da Cuira ina contribuziun
chantunala da 150'000 francs.
Projects da vias
La regenza ha approvà totalmain 5'200'000 francs per construir e per
sanar il suandant traject da via:
- via naziunala A28: lavurs d'impressari, sviament da Küblis
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun