Il chantun Grischun rinforza la promoziun da l'integraziun da
fugitivas e da fugitivs renconuschids sco er da persunas admessas
provisoricamain. La regenza grischuna ha approvà il concept
correspundent ed ha incumbensà l'uffizi da fatgs da polizia e da dretg
civil dal Grischun cun la realisaziun da tal. Per la promoziun da
l'integraziun installescha il chantun in post da coordinaziun tar
l'uffizi da fatgs da polizia e da dretg civil.
Il nov concept fixescha il rom per la concepziun e per las finamiras
da la promoziun da l'integraziun per questas gruppas da persunas. En
l'avegnir duain las mesiras d'integraziun vegnir instradadas directamain
suenter la renconuschientscha sco fugitiva u sco fugitiv ubain
directamain suenter l'admissiun provisorica. Suenter in'analisa da la
situaziun individuala vegnan fixadas e realisadas mesiras en il sectur
da la promoziun linguistica e mesiras en vista ad in'activitad da
gudogn. Responsabel per il contact, per l'attribuziun e per la
coordinaziun da la promoziun da l'integraziun è il nov post da
coordinaziun central. Quel vegn manà da l'incumbensada chantunala
d'integraziun.
Las purschidas d'integraziun vegnan concepidas tenor il princip
"promover e pretender" e duain - sche pussaivel - avair lieu entaifer
las structuras regularas existentas, sco la scola, la furmaziun
professiunala ed il martgà da lavur. Nua che las purschidas regularas
n'adempleschan betg ils basegns spezials da la gruppa en mira, èn
planisadas mesiras specificas. Tant il post da coordinaziun sco er las
mesiras d'integraziun vegnan finanziads cun la pauschala d'integraziun
da la confederaziun.
Approvà il nov urden da diever da la biblioteca
chantunala
Per il 1. da zercladur 2009 survegn la biblioteca chantunala dal
Grischun in nov urden da diever. Quel è vegnì approvà da la regenza
grischuna e regla tranter auter l'utilisaziun da las medias, ils termins
d'emprest, las admoniziuns e las taxas. Il nov reglament remplazza
l'urden da diever existent che datescha da l'onn 1994.
Da vischnancas e da regiuns
- Seglias - Ziràn-Reschen: Il plan dal cunfin tranter las vischnancas
da Seglias e da Ziràn-Reschen vegn approvà.
- Casti-Vargistagn - Stussavgia: Il plan dal cunfin tranter las
vischnancas da Casti-Vargistagn e da Stussavgia vegn approvà.
- Scuol: L'installaziun d'in ascensur vi da la chasa da scola dal
stgalim superiur a Scuol vegn approvada e sustegnida cun ina
contribuziun chantunala da maximalmain 91'800 francs.
Contribuziuns chantunalas a differentas instituziuns
- Center per persunas attempadas Serata, Zizers: Il project preliminar
per sanar, per midar e per engrondir il center per persunas attempadas
Serata a Zizers vegn approvà. Cun resalva da l'approvaziun definitiva
dal project vegn garantida a l'instituziun responsabla ina contribuziun
chantunala da maximalmain 5'800'000 francs.
- Promoziun da la cultura: La regenza ha concedì contribuziuns da
totalmain 291'500 francs per promover 13 occurrenzas ed ovras
culturalas.
- Project OGNA: Al project OGNA a Trun vegn pajada ina contribuziun
unica da maximalmain 100'000 francs. Tras il project duai vegnir
construida a Trun ina sculptura accessibla da l'artist grischun Matias
Spescha (1925 - 2008).
- Project "Parcs da vacanzas en Svizra": Il chantun Grischun sustegna
il project "Parcs da vacanzas en Svizra" cun maximalmain 80'000 francs.
Quai sut la premissa ch'il secretariat da stadi per l'economia (SECO),
ch'ils chantuns Berna e Vallais sco er che Landal Green Parks sa
participeschian medemamain cun mintgamai 20 pertschient als custs totals
da 400'000 francs.
Projects da vias
La regenza ha approvà totalmain 1'300'000 francs per construir e per
sanar ils suandants trajects da vias:
- via dal Flüela: lavurs d'impressari e da cuvrida, Plan Grond - God
Champatsch
- via da Stussavgia: lavurs d'impressari, punt dal Bächer Tobel
Gremi: regenza
Funtauna: rg chanzlia chantunala dal Grischun