Navigation

Inhaltsbereich

  • Erste Mitteilung
  • Neuen Beitrag einfügen
En il Grischun duai dastgar vegnir manada ina scola privata internaziunala en la regiun da Cuira. La regenza grischuna ha prendì enconuschientscha dal concept correspundent da la Swiss International Schools SA (SIS). La premissa per la gestiun è il fatg che la scola resguarda e realisescha las directivas da basa dal plan d'instrucziun e da l'urari dal chantun. La decisiun da la regenza na vala betg sco pregiudizi per autras scolas internaziunalas.
En differents chantuns vegnan manadas scolas internaziunalas. En emprima lingia duain quellas garantir ad uffants da geniturs che exequeschan ina professiun internaziunala da midar senza problems ad ina scola internaziunala en in auter pajais. Concretamain è ussa avant maun en il Grischun ina dumonda da la Swiss International Schools SA per avrir ina scola internaziunala en la regiun da Cuira. En questa scola duain l'englais ed il tudestg esser linguas da mintgadi e da lavur equivalentas. Igl è previs da cumenzar cun il manaschi da scola l'onn da scola 2010/2011. L'evaluaziun da lieus da scola pussaivels en la regiun da Cuira n'è anc betg terminada.
Da princip han las scolas privatas en il Grischun las medemas obligaziuns sco las scolas publicas. Ellas na survegnan dentant naginas contribuziuns dal chantun. Gist en temps d'ina crisa economica po - tenor l'avis da la regenza - l'installaziun d'ina scola internaziunala augmentar l'attractivitad dal Grischun. L'installaziun d'ina tala scola en la Val dal Rain grischuna correspunda als interess da la promoziun da l'economia e po er rinforzar il Grischun sco lieu da furmaziun.

Reglà da nov la nominaziun dals vins dal Grischun
A las producentas ed als producents da vin grischun vegni pussibilità da nov da vender lur vins sut differentas noziuns specificas per vin. La regenza grischuna ha adattà e mess en vigur l'ordinaziun davart la viticultura e l'import da vin per il 1. da zercladur 2009.
Cun la revisiun parziala vegnan fixadas las noziuns che pon vegnir duvradas per vins dal chantun Grischun. Latiers tutgan las noziuns "selecziun", "vendemia tardiva", "selecziun d'ivas" e "chastè". Las disposiziuns en l'ordinaziun reglan detagliadamain las premissas, sut tge noziun ch'ils differents vins dastgan vegnir vendids. Las noziuns èn vegnidas examinadas dal post spezialisà per viticultura dal center da furmaziun e cussegliaziun agricula Plantahof ensemen cun la suprastanza da la federaziun interprofessiunala e cun l'uffizi per la segirezza da victualias e per la sanadad d'animals.

La regenza beneventa las ordinaziuns dal project federal dal traffic da rauba
La regenza grischuna beneventa da princip las propostas da revisiun da las ordinaziuns dal project dal traffic da rauba che vegnan messas en discussiun da la confederaziun. Quellas cuntegnan adattaziuns che sa basan sin las leschas federalas ch'èn vegnidas deliberadas da las chombras federalas il december 2008 en il rom dal project dal traffic da rauba. Lur intent è en spezial quel da sviluppar vinavant la politica da spustar il traffic da rauba da la via sin la viafier.
Pli gronda che la proximitad a la clientella saja en las ordinaziuns sco er pli ferm ch'ellas tegnian quint dals basegns dal martgà e pli tgunsch ch'ellas adempleschian las finamiras da la politica da traffic dal legislatur da spustar il traffic da rauba, scriva la regenza en sia resposta da consultaziun a la confederaziun. La regenza deplorescha però ch'i na sajan anc betg avant maun las propostas da midar ulteriuras ordinaziuns ch'èn vegnidas fatgas en il rom da l'audiziun. En spezial la reordinaziun dals pretschs dals trassés ha ina gronda influenza sin l'augment da la part da la viafier en il traffic da rauba e sin la sanaziun dals vaguns da martganzia cunter canera.

Da vischnancas e da regiuns
- Differentas vischnancas: Il project "reparaziun d'ovras da protecziun 2009", in project collectiv da differentas vischnancas, vegn approvà. L'object dal project èn en tut 44 objects da reparaziun. Als custs vegn garantida ina contribuziun da maximalmain 4'712'000 francs.
- Trin: Il project supplementar tar il project "via da guaud Trin Vitg - Munt Sura" da la vischnanca da Trin vegn approvà e sustegnì cun ina contribuziun da maximalmain 475'700 francs.
- Claustra-Serneus: La revisiun parziala da la planisaziun locala "ennavada da Gotschna" da la vischnanca da Claustra-Serneus vegn approvada cun las cundiziuns usitadas.
- Samedan: La revisiun parziala da la planisaziun locala da la vischnanca da Samedan dals 11 da december 2008 vegn approvada.
- Val Müstair: La revisiun parziala da la planisaziun locala "engrondiment da la zona da mastergn en il territori da Palü Daint" da la vischnanca da Müstair vegn approvada.

Projects da vias
La regenza ha approvà totalmain 690'000 francs per construir e per sanar il suandant traject da via:
- via da Lüen: lavurs d'impressari tranter Starlungs e Lüen
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel