Navigation

Inhaltsbereich

  • Erste Mitteilung
  • Neuen Beitrag einfügen
En sia missiva dals 26 da matg 2009 propona la regenza ch'il chantun duaja cumprar l'edifizi dal cussegl grond a la via da Masans 3 a Cuira. Sut il presidi dal deputà Bruno Tscholl ha la cumissiun predeliberanta dal cussegl grond discutà ussa questa fatschenta ch'è tractandada per la sessiun d'avust 2009. A la sesida è sa participà er il cusseglier guvernativ Stefan Engler.
La cumissiun predeliberanta è arrivada unanimamain a la conclusiun da recumandar al cussegl grond d'acceptar il project. L'anteriur arsenal a la via da Masans era vegnì transfurmà ils onns 1950 en in edifizi parlamentar e vegnì finanzià da la cassa da pensiun chantunala. Suenter che las lavurs da construcziun eran stadas terminadas, ha il chantun prendì a tschains las localitads da la cassa da pensiun. Ussa è il chantun dapi 50 onns locatari da l'edifizi dal cussegl grond e tenor il contract da locaziun vertent è el lià anc 28 onns vi da quest contract. En connex cun l'independenza giuridica da la cassa da pensiun chantunala per il 1. da schaner 2008 è er l'edifizi dal cussegl grond vegnì en la proprietad da la cassa. Sin basa dal contract da locaziun existent sto il chantun Grischun surpigliar gia oz per part obligaziuns da proprietari, e plinavant ha el fatg ad agens custs diversas installaziuns specificas che n'èn betg stadas bunmartgadas. L'acquist da l'edifizi permetta pia da crear relaziuns da proprietad cleras ed unitaras. En l'administraziun d'immobiglias croda davent la problematica da stuair definir adina puspè las cumpetenzas tranter la locatura ed il locatari. Quai vegn ad avair in effect positiv sin ils custs administrativs. La cumpra da l'edifizi dal cussegl grond custa 8.3 milliuns francs. En cumparegliaziun cun il contract da locaziun vertent vegn l'acquist a sa pajar a lung vista.
La cumissiun predeliberanta supplitgescha anc da sclerir la situaziun en connex cun la nova entrada da l'edifizi. En sia ediziun dals 8 da fanadur 2009 ha la "Südostschweiz" rapportà ch'il cussegl grond haja beneventà il project "Equiliber". Questa decleraziun na correspunda betg als fatgs, perquai che l'entrada da l'edifizi dal cussegl grond è vegnida decidida da la regenza en atgna cumpetenza. En il rom da sias debattas ha il cussegl grond approvà il preventiv global, senza dentant menziunar u entrar spezialmain en la tematica da l'entrada.

Infurmaziuns:
deputà Bruno Tscholl, president da la cumissiun predeliberanta, tel. 081 257 07 65

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond
Neuer Artikel