Las ultimas emnas han ils meds d'instrucziun dal Grischun pudì engrondir il sortiment dal rom istorgia sin il stgalim primar da las scolas rumantschas e talianas. Da nov po il med d'instrucziun UrgeschiCHte - Preistorgia - Archestoria vegnir retratg en trais linguas.

Archeologia Svizra ha edì l'onn 2004 la mappa "UrgeschiCHte". Quest med d'instrucziun ch'è vegnì elavurà cuminaivlamain da persunas d'instrucziun e d'archeologas e d'archeologs gida ils uffants da la scola primara a scuvrir per sai e da chapir meglier la preistorgia e la protoistorgia da la Svizra.
En collavuraziun cun ils meds d'instrucziun dal Grischun e cun il chantun Tessin ha Archeologia Svizra pussibilità ussa er translaziuns en las ulteriuras linguas chantunalas. Il cuntegn da tut la mappa è ussa disponibel dapi curt sin in DC-ROM per las scolas talianas. Er per las scolas rumantschas è vegnì realisà in DC-ROM. Quel cuntegna en rumantsch grischun tut ils texts ch'èn relevants per las scolaras e per ils scolars. Quest DC vegn duvrà ensemen cun la mappa tudestga.
En il center da la publicaziun originala stattan 14 illustraziuns en colur da format grond e texts per leger che tutgan tiers e che correspundan al stadi actual da la scienza. Per las persunas d'instrucziun stattan ultra da quai a disposiziun propostas didacticas e texts infurmativs davart las epocas dal temp paleolitic fin al temp medieval tempriv. Las 14 illustraziuns en colur mussan tge che vegn quintà en ils texts ed intermedieschan in maletg da l'epoca respectiva. Ina legenda declera als uffants las particularitads dals maletgs.
Tut las trais versiuns linguisticas pon vegnir retratgas tar ils meds d'instrucziun dal Grischun ( www.lmv.gr.ch ).

Adressa da contact
Josy Marie Künzler, scheffa da la secziun "meds d'instrucziun", uffizi per la scola populara ed il sport, Quaderstrasse 17, 7000 Cuira, telefon: 081 257 22 61, e-mail: josy.kuenzler@avs.gr.ch

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient