Cuntegn da la pagina

La finanziaziun da la tgira sto vegnir reglada da nov

  • Erste Mitteilung
  • Neuen Beitrag einfügen
Il chantun Grischun sto reglar da nov la finanziaziun da la tgira e l'adattar a las directivas da la confederaziun. La regenza grischuna ha deliberà la missiva correspundenta tar la revisiun parziala da la lescha per promover la tgira da persunas malsaunas. En il futur vegnan il chantun e las vischnancas a stuair impunder tut en tut 3.8 respectivamain 3.4 milliuns francs dapli per onn per finanziar la tgira. Da l'autra vart vegnan las assicuranzas da malsauns distgargiadas per circa 4.2 milliuns francs e las pazientas ed ils pazients per 2.6 milliuns francs per onn. Il cussegl grond vegn a tractar la fatschenta en la sessiun d'avust 2010.

Il 1. da schaner 2011 entra en vigur la lescha federala davart la reordinaziun da la finanziaziun da la tgira. La finanziaziun dals custs da tgira vegn cun quai reglada da nov da las differentas purtadras e dals differents purtaders dals custs en il sectur ambulant e staziunar. Da nov vegni differenzià tranter prestaziuns da tgira duvradas a lunga vista e prestaziuns da la tgira acuta e transitorica suenter ina dimora a l'ospital. Las prestaziuns da la tgira acuta e transitorica pon vegnir furnidas durant maximalmain 14 dis. Las contribuziuns che l'assicuranza obligatorica per la tgira da persunas malsaunas paja a las prestaziuns da tgira vegnan fixadas da la confederaziun en moda unitara per l'entira Svizra tenor il basegn da tgira. Las persunas che basegnan tgira dastgan vegnir engrevgiadas cun maximalmain 20 pertschient da la contribuziun da tgira maximala da las assicuranzas da malsauns che vegn fixada dal cussegl federal. Ils chantuns ston reglar la finanziaziun dals custs restants. Las prestaziuns da la tgira acuta e transitorica vegnan finanziadas tenor las reglas da la finanziaziun dals ospitals. Las persunas che basegnan tgira na ston pia betg sa participar a quests custs.

La reordinaziun federala da la finanziaziun da la tgira ha duas finamiras: D'ina vart na duain las cassas da malsauns betg vegnir engrevgiadas supplementarmain da prestaziuns da tgira che vegnan chaschunadas da la vegliadetgna. Da l'autra vart vul la confederaziun meglierar la situaziun economica precara da persunas che basegnan fitg blera tgira.

Nova regulaziun en il sectur staziunar da las chasas da tgira
La revisiun parziala da la lescha per promover la tgira da persunas malsaunas, che vegn proponida da la regenza, prevesa differentas adattaziuns per realisar la reordinaziun federala da la finanziaziun da la tgira. Il dretg da survegnir contribuziuns en il sectur staziunar han tut las chasas da persunas attempadas e da tgira che figureschan sin la glista chantunala da las chasas da tgira. Quai èn actualmain 48 instituziuns che mettan a disposiziun circa 2'300 letgs da tgira. Quellas han il dretg sin contribuziuns da l'assicuranza obligatorica per la tgira da persunas malsaunas, sin la participaziun als custs tras las persunas che basegnan tgira, sin la finanziaziun dals custs restants per prestaziuns da tgira tras il maun public e sin contribuziuns dal maun public als custs da las prestaziuns da la tgira acuta e transitorica. La regenza fixescha ils custs renconuschids per la finanziaziun restanta sco er la participaziun maximala als custs tras las abitantas e tras ils abitants da las chasas da dimora, differenziads tenor differentas categorias sco custs da pensiun, custs da reparaziun e da renovaziun, custs d'assistenza e custs da tgira. Ultra dals custs da pensiun e d'assistenza ston da nov vegnir surpigliads er ils custs da reparaziun e da renovaziun exclusivamain da las abitantas e dals abitants da las chasas da dimora. A las abitantas ed als abitants da las chasas da dimora po vegnir messa a quint la participaziun als custs ch'è maximalmain pussaivla tenor la legislaziun federala. Las contribuziuns che las vischnancas ston pajar als custs da las prestaziuns da tgira ed als custs d'investiziun vegnan fixadas da nov en la lescha. Da chasas da tgira favuraivlas duain las abitantas ed ils abitants profitar e betg las vischnancas. Per quest intent vegni determinà per las chasas da tgira favuraivlas ch'ellas concepeschian las tariffas ch'ellas mettan a quint a lur abitantas ed a lur abitants en tala moda ch'i na resultian naginas reservas sproporziunadas.

Ils custs restants per prestaziuns da tgira en il sectur staziunar che na vegnan betg cuvrids da las contribuziuns da l'assicuranza obligatorica per la tgira da persunas malsaunas e dals custs che dastgan vegnir adossads a las abitantas ed als abitants da las chasas da dimora, vegnan finanziads da nov tras il chantun cun 15 pertschient e tras las vischnancas cun 85 pertschient. Obligada da surpigliar ils custs è da nov quella vischnanca, nua che l'abitanta u l'abitant aveva ses domicil da dretg civil, avant che entrar en la chasa da dimora. La regenza fixescha la part da las indemnisaziuns ch'il maun public sto pajar per prestaziuns da la tgira acuta e transitorica ch'èn vegnidas concludidas tranter las assicuranzas da malsauns e las chasas da persunas attempadas e da tgira. Tenor il dretg federal sto questa part importar almain 55 pertschient.

Nova regulaziun en il sectur ambulant
En il sectur ambulant fixescha la regenza sco fin ussa ils custs renconuschids per las prestaziuns da tgira da tut las furnituras e da tut ils furniturs da prestaziuns ambulantas che han il dretg da survegnir contribuziuns, e da nov fixescha ella er ils custs che dastgan vegnir adossads maximalmain a las clientas ed als clients. En il senn dal princip da la politica da sanadad "ambulant avant staziunar" dastga vegnir messa a quint a las clientas ed als clients maximalmain la mesadad da la participaziun als custs per prestaziuns da tgira ch'è pussaivla tenor la legislaziun federala.

En il sectur ambulant surpiglia il chantun 55 pertschient da la finanziaziun restanta dals custs da las prestaziuns da tgira. Las vischnancas da lur vart ston surpigliar 45 pertschient. Obligada da pajar è da nov medemamain la vischnanca da domicil da la clienta u dal client. Sin fundament dal dretg federal ston il chantun e las vischnancas er surpigliar da nov la finanziaziun restanta dals custs da tgira da tgirunzas e da tgirunzs cun activitad da gudogn independenta e dals custs dals servetschs da spitex senza incumbensa da prestaziun da las vischnancas. Sco fin ussa na survegnan tgirunzas e tgirunzs cun activitad da gudogn independenta – cuntrari als servetschs da spitex – betg contribuziuns dal maun public a las prestaziuns da tegnairchasa e da tgira sco er al servetsch da pasts. En quai che concerna ils custs da las prestaziuns da la tgira acuta e transitorica ch'il maun public sto pajar, vala confurm al senn la medema regulaziun sco tar las chasas da tgira.

En il chantun Grischun vegnan las prestaziuns da tgira ambulantas furnidas oz da 21 servetschs ch'èn renconuschids da la regenza sco servetschs subvenziunabels. L'onn 2008 han circa 4'600 clientas e clients duvrà quests servetschs da spitex.

Custs supplementars da passa 7 milliuns francs per il maun public
Cun la reordinaziun proponida da la finanziaziun da la tgira en il chantun vegn l'assicuranza obligatorica per la tgira da persunas malsaunas distgargiada tut en tut per var 4.2 milliuns francs per onn, e las persunas che abitan en chasas da dimora sco er las clientas ed ils clients da la spitex vegnan distgargiads tut en tut per 2.6 milliuns francs per onn. Quests ultims profiteschan dal fatg ch'ils imports da facultad libers da taglia vegnan auzads da la confederaziun tar las prestaziuns supplementaras. Custs supplementars da var 7.2 milliuns francs per onn vegnan percunter chaschunads al maun public tras la finanziaziun restanta ch'el sto surpigliar da nov. Tut en tut vegnan engrevgiads il chantun per 3.8 milliuns francs e las vischnancas per 3.4 milliuns francs per onn.

Adattaziuns suenter la refusa da la NGF grischuna
Suenter che las votantas ed ils votants dal Grischun avevan refusà ils 7 da mars 2010 la NGF grischuna, ha il project stuì vegnir surlavurà en divers puncts. Uschia sa basa la proposta da la missiva da nov sin la lescha vertenta per promover la tgira da persunas malsaunas e betg sco il sboz da consultaziun sin la lescha per promover la tgira da persunas malsaunas ch'è vegnida revedida parzialmain dal cussegl grond en connex cun la NGF grischuna. Tar la tgira ed assistenza a chasa en il sectur ambulant vegni partì da la tariffa vertenta da contribuziun chantunala da 55 pertschient dals custs che n'èn betg cuvrids e betg da la tariffa da contribuziun armonisada dad 85 pertschient tenor la NGF grischuna. Medemamain han stuì vegnir calculadas da nov las consequenzas finanzialas ch'il project ha per las singulas purtadras e per ils singuls purtaders dals custs.


Infurmaziuns:
cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun
Neuer Artikel