La regenza grischuna ha avert la consultaziun tar il relasch d'ina nova lescha chantunala da geoinfurmaziun. Ultra da quai ha ella designà in'emprima transcha da las raits da distribuziun localas.
La consultaziun davart il relasch d'ina lescha chantunala da geoinfurmaziun è lantschada
En il Grischun duain vasts circuls pudair utilisar facilmain e favuraivlamain las geodatas. La basa legala correspundenta sto vegnir adattada a las novas prescripziuns da la confederaziun e vegnir resumada en la nova lescha chantunala da geoinfurmaziun. La regenza grischuna ha deliberà il sboz da la lescha per la consultaziun.
Geodatas èn datas che concernan il territori e che descrivan l'extensiun e las caracteristicas da tscherts spazis e da tscherts objects, en spezial lur situaziun, lur natira, lur utilisaziun e lur relaziuns giuridicas. Geodatas èn p.ex. las datas da la mesiraziun uffiziala u ils plans da zonas.
Cun la lescha federala davart la geoinfurmaziun, ch'è entrada en vigur il 1. da fanadur 2008, ha la confederaziun repassà cumplessivamain la basa giuridica per sias geodatas e dà in rom unitar a quellas. Il nov dretg da geoinfurmaziun regla d'ina vart la registraziun da singulas geodatas da la confederaziun e da l'autra vart l'utilisaziun da las geodatas che ston vegnir fatgas accessiblas tras servetschs da preschentaziun e da download.
A questas novas prescripziuns federalas ston ussa er vegnir adattadas las disposiziuns chantunalas, ed i ston vegnir relaschadas regulaziuns correspundentas per las geodatas chantunalas. Il sboz da la lescha ha l'intenziun da metter a disposiziun geodatas a custs raschunaivels ed en la qualitad necessaria per ina vasta utilisaziun.
Per cuntanscher questa finamira èsi necessari d'installar in center chantunal da geodatas che publitgescha las geodatas. In tal center è gia oz en funcziun (
www.geogr.ch). Il sboz da la nova lescha da geoinfurmaziun prevesa da fixar quest center da geodatas sco post central per consegnar las datas en il chantun. Las vischnancas pon ultra da quai manar agens centers da geodatas.
La nova lescha prevesa plinavant che las geodatas, ch'èn accessiblas al public, pon vegnir consultadas gratuitamain e vegnir stampadas fin ad in tschert format. Per retrair ulteriuras geodatas duain – sco fin ussa – vegnir incassadas taxas che varieschan tut tenor il temp impundì e che gidan a finanziar il manaschi dal center da geodatas.
En la nova lescha da geoinfurmaziun vegnan medemamain integradas las regulaziuns davart la mesiraziun uffiziala. En il chantun Grischun duai la finala vegnir creada da nov a medem temp ina basa legala per in cataster dals conducts respectivamain per in plan da survista dals conducts d'ovra.
Ils documents da consultaziun èn accessibels sur la pagina d'internet dal departament d'economia publica e fatgs socials
www.dvs.gr.ch sut la rubrica temas / projects. La consultaziun dura fin ils 15 d'october 2010.
In'emprima transcha da las raits da distribuziun localas èn designadas
La regenza grischuna ha fixà l'emprima transcha dals territoris da provediment locals. Quels vegnan designads en il rom da la lescha federala davart il provediment d'electricitad ch'è entrada en vigur parzialmain il 1. da schaner 2008.
Questa lescha regla d'ina vart la liberalisaziun dal martgà d'electricitad che sto vegnir introducida en etappas – da l'autra vart las raits da transmissiun e da distribuziun che restan en il monopol. La lescha incumbensescha ils chantuns da designar ils territoris da provediment da las gestiunarias da raits ch'èn activas sin lur territori. La realisaziun respectiva è fixada en la nova lescha chantunala davart il provediment d'electricitad ch'è en vigur dapi il 1. da settember 2009. En lur territoris da provediment ston las gestiunarias da raits mintgamai garantir il provediment da basa, la segirezza dal provediment sco er l'access a la rait senza discriminaziuns.
Sin basa da las reacziuns da las vischnancas è vegnì elavurà in sboz per designar ils territoris da las raits da distribuziun localas. En quest sboz han 68 territoris da raits da distribuziun localas, che cuvran la surfatscha da 164 vischnancas, pudì vegnir preschentads per la designaziun tras la regenza. Per las ulteriuras vischnancas n'han dentant betg pudì vegnir fatgas attribuziuns u designaziuns fin ussa, perquai ch'igl han anc lieu differents scleriments cun las gestiunarias da raits. Las vischnancas pertutgadas ston ussa prender suenter quai fin la fin da december 2010. Er las raits da distribuziun regiunalas e surregiunalas vegnan designadas pli tard. Ils plans cun la designaziun dals territoris da las raits da distribuziun localas vegnan publitgads sin la pagina d'internet da l'uffizi d'energia e da traffic dal Grischun.
Gremi: regenza
Funtauna: rg chanzlia chantunala dal Grischun