Gia oz spetgan las chatschadras ed ils chatschaders grischuns cun fevra la proxima stagiun da chatscha che cumenza quest onn il 1. da settember. Ellas ed els fan las emprimas preparaziuns. Equipads cun il perspectiv e cun il telescop passentan ellas ed els mintga minuta libra en il territori da chatscha. Passiunadamain vegni "spievlà", observà la selvaschina e sias disas. A chasa vegnan rimnads ils utensils da chatscha, las victualias e las bavrondas per il transport en la chamona da chatscha. Èn vegnidas pajadas las taglias e l'assicuranza da responsabladad obligatorica? Èn enconuschentas las novaziuns las pli impurtantas da la lescha da chatscha? Han ellas ed els regulà persunalmain las armas da chatscha, e quai mo en ils lieus ch'èn vegnids inditgads da las vischnancas, sco quai che la lescha prescriva?
E la finala, per terminar las preparaziuns, cura e nua pon ellas ed els retrair la patenta da chatscha? En il fegl uffizial dal chantun Grischun dals 5 d'avust 2010 èn publitgads ils lieus, las datas e las uras da las venditas da las patentas.

Attenziun: Il biro per passaports e patentas n'emetta betg pli patentas da chatscha.

A partir dals 10 d'avust 2010 emetta il museum dalla natira dal Grischun a Cuira patentas da chatscha.
Servetsch al spurtegl: mardi fin sonda, da las 10.00 fin las 17.00.
Sco fin ussa pon tut las patentas da chatscha er vegnir retratgas tar ils organs da surveglianza da chatscha.

Al spurtegl dal museum da la natira dal Grischun resp. tar ils organs da surveglianza da chatscha èsi pussaivel da cumprar las patentas da chatscha cun cartas da debit. Acceptadas vegnan cartas sco Maestro u Postcard. L'import che sto vegnir pajà vegn tratg giu directamain da Voss conto senza quintar ina cumissiun. Per garantir in pajament senza incaps supplitgain nus las chatschadras ed ils chatschaders che pajan cun cartas da debit da controllar ordavant che la carta da debit ha tant ina limita per di sco er ina limita per mais. Eventuals augments da las limitas ston vegnir dumandads a temp tar l'atgna banca. Cartas da credit sco Visa u MasterCard na vegnan betg acceptadas sco meds da pajament.

Nus giavischain ina buna mira ed ina ritga preda!

Gremi: Uffizi da chatscha e pestga dal Grischun
Funtauna: rg Uffizi da chatscha e pestga dal Grischun