La "maisa radunda", ch'era vegnida convocada l'onn 2009 dal chantun Grischun per far frunt a la mancanza da persunal da tgira, mussa effects positivs. Tenor ina maioritad da las participantas e dals participants na dovri actualmain naginas ulteriuras activitads da la "maisa radunda". Las scuntradas duain dentant vegnir mantegnidas sco plattafurma per barattar infurmaziuns e duain avair lieu en l'avegnir ina giada per onn.

Per cumbatter la mancanza imminenta da persunal da tgira en ils ospitals, en las clinicas, en las chasas da persunas attempadas e da tgira sco er tar la spitex aveva la scheffa dal departament da giustia, segirezza e sanadad, cussegliera guvernativa Barbara Janom Steiner, envidà la stad 2009 represchentantas e represchentants da las federaziuns da patrunas e da patruns (federaziun grischuna "chasas ed ospitals", federaziun grischuna da spitex, organisaziuns dal mund da lavur "sanadad e fatgs socials"), da las federaziuns professiunalas, dals lieus da scolaziun e dals uffizis cumpetents ad ina "maisa radunda". En quatter gruppas da lavur èn alura vegnidas elavuradas e proponidas mesiras multifaras per cumbatter la mancanza da persunal.

A chaschun da l'ultima radunanza dals 22 da mars 2011 han las participantas ed ils participants da la "maisa radunda" constatà cun satisfacziun che las mesiras ch'èn vegnidas realisadas en il fratemp (cf. agiunta) han gì per consequenza che bler dapli persunas han absolvì l'onn 2010 la scolaziun d'emploiada u d'emploià spezialisà da sanadad. L'effect d'autras mesiras ch'èn vegnidas instradadas per recrutar persunal da tgira – sco l'introducziun d'ina scolaziun da tgirunza u da tgirunz diplomà SSS cumplementara a la professiun – na sa lascha betg anc giuditgar per il mument. L'effect da las mesiras prendidas duai vegnir giuditgà en il rom d'in monitoring. Per pudair realisar en il chantun in vast pachet da mesiras cuntinuantas en il sectur da la furmaziun professiunala e da la purschida da plazzas da lavur ha la federaziun grischuna "chasas ed ospitals" l'intenziun d'augmentar – ensemen cun la federaziun grischuna da spitex – il dumber da persunal da las organisaziuns dal mund da lavur "sanadad e fatgs socials" dal Grischun.

Ord vista da las participantas e dals participants da la "maisa radunda" po la situaziun actuala da persunal en ils manaschis dals fatgs da sanadad vegnir designada en general sco buna en il Grischun. Quai vala en spezial per la Val dal Rain da Cuira. Ils manaschis ordaifer la Val dal Rain da Cuira annunzian ina mancanza da persunal da tgira diplomà indigen en il sectur da la tgira da lunga durada. En general manchi persunal da tgira indigen cun scolaziuns spezialas (spendrera, staziun intensiva, staziun intensiva d'uffants, sala d'operaziun).

Per il mument na dovri – tenor l'avis da la gronda part da las participantas e dals participants – naginas ulteriuras activitads da la "maisa radunda". Sco empermess a la "maisa radunda" vegnan las mesiras ch'eran vegnidas elavuradas e proponidas da la "maisa radunda" resp. da las gruppas da lavur, ma che n'èn betg anc vegnidas realisadas, prendidas per mauns da las organisaziuns da las patrunas e dals patruns (federaziun grischuna "chasas ed ospitals", federaziun grischuna da spitex) sin plaun operativ, perquai che questas mesiras èn cunzunt da natira operativa. En vista a l'avegnir èsi necessari da dar in'attenziun speziala al mantegniment dal persunal e da prender mesiras per prolungar il temp che las tgirunzas ed ils tgirunzs restan fidaivels a lur professiun.

Per las participantas e per ils participants èsi stà cunvegnent da mantegnair la "maisa radunda" sco plattafurma per barattar infurmaziuns en il senn d'in giudicament permanent da la situaziun. Las radunanzas duain avair lieu annualmain, nun ch'ina midada da las cundiziuns generalas pretendia da sa radunar a curta vista.


Infurmaziuns:
cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: departament da giustia, segirezza e sanadad
Funtauna: rg departament da giustia, segirezza e sanadad