La regenza grischuna ha deliberà sia missiva tar l'iniziativa chantunala dal pievel cunter birocrazia e reglamentaziuns nunnecessarias. Ella propona al cussegl grond da recumandar al pievel d'acceptar la "iniziativa IPM" senza cuntraproposta. Tenor l'avis da la regenza ha il chantun Grischun gia concludì e realisà bleras mesiras che cuvran la finamira da l'iniziativa. Il parlament vegn a tractar la fatschenta en la sessiun da zercladur 2011.
La "iniziativa IPM" (iniziativa chantunala dal pievel cunter birocrazia e reglamentaziuns nunnecessarias) ch'è vegnida inoltrada ils 8 da zercladur 2010 è reussida cun 4'389 suttascripziuns valaivlas. L'iniziativa dal pievel è vegnida redigida sco iniziativa constituziunala en furma d'in sboz elavurà. Ella pretenda ch'il chantun e che las vischnancas prendian mesiras per limitar tant sco pussaivel il dumber da regulaziuns e la chargia administrativa per interpresas, en spezial per las interpresas pitschnas e mesaunas (IPM).
La regenza sustegna ils giavischs e la finamira da l'iniziativa. Sco ch'ella menziunescha en sia missiva manca fin ussa en la constituziun dal chantun ina incumbensa expressiva en connex cun la distgargia administrativa. La finamira da l'iniziativa da distgargiar l'administraziun da las IPM uschè fitg sco pussaivel, po il chantun Grischun dentant gia far cun las disposiziuns da la politica economica ch'existan en la constituziun chantunala. Consequentamain ha l'administraziun chantunala gia en il passà introducì differents instruments per distgargiar administrativamain interpresas, sumegliantamain a la confederaziun.
Il chantun enconuscha gia differents instruments per distgargiar las IPM
L'onn 2007 ha il chantun Grischun installà in uschenumnà gremi da coordinaziun per la politica da las IPM. Quest gremi dad IPM examinescha leschas ed ordinaziuns novas u gia existentas sco er lur execuziun areguard barrieras administrativas per las IPM. In ulteriur instrument ch'il chantun ha gia lantschà l'onn 1996 è l'essenzialisaziun e la flexibilisaziun da la legislaziun e da l'applicaziun dal dretg (EFLAD). Quest project cumplessiv – ch'il Grischun ha lantschà sco emprim chantun da la Svizra – ha en mira in agir effizient da l'administraziun e quai tras rectifitgar e meglierar sistematicamain la legislaziun. Uschia vegn er l'administraziun distgargiada.
Mesiras supplementaras èn per exempel la verificaziun periodica da las incumbensas tenor la constituziun chantunala ubain las finamiras – ch'èn vegnidas fixadas en la strategia dad e-government – da reglar process da fatschenta tranter l'administraziun e las IPM sin via electronica. Per quest intent è per exempel vegnì installà en l'internet in portal per interpresas. Plinavant ha l'administraziun da taglia prendì differentas mesiras e p.ex. introducì – per persunas giuridicas – ina software d'explicaziun per la decleraziun da taglia. Er tar la domiciliaziun d'interpresas novas ha il chantun pudì meglierar la coordinaziun cun ils differents posts da servetsch en il senn dal princip da "one-stop-shop" (vul dir d'in unic post responsabel).
Tenor l'avis da la regenza cuvran questas ed ulteriuras mesiras la finamira da l'iniziativa. La cumparegliaziun cun auters chantuns mussa ch'il Grischun ha ademplì sias incumbensas en quest sectur. Il chantun vegn a sa stentar vinavant da meglierar las mesiras existentas e d'examinar las novas. Perquai sustegna la regenza la cumplettaziun da la constituziun chantunala che vegn proponida cun l'iniziativa. Uschia vegniss fixada ina clera incumbensa constituziunala. La regenza propona ord quest motiv al cussegl grond da recumandar al pievel d'acceptar l'iniziativa IPM. Ella desista er d'ina cuntraproposta.
Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01
Gremi: regenza
Funtauna: rg chanzlia chantunala dal Grischun