La regenza grischuna ha deliberà la missiva tar il relasch d'ina nova lescha chantunala da geoinfurmaziun. Tenor quella duai er en l'avegnir in vast circul pudair far diever facilmain e favuraivlamain da geodatas en il Grischun. A medem temp vegn la basa giuridica adattada a las novas prescripziuns da la confederaziun. Il cussegl grond vegn a tractar questa fatschenta en la sessiun da zercladur 2011.
En il passà èn vegnidas registradas e derasadas adina dapli geoinfurmaziuns sin via electronica. Las geodatas èn essenzialas per l'agir planisatoric e vegnan duvradas en l'administraziun, en l'economia, en la scienza sco er en ils conturns privats. Il chantun Grischun ha percurschì gia baud la muntada da geodatas ed ha procurà a temp per l'installaziun coordinada d'in sistem d'infurmaziun geografica (SIG) en l'administraziun. Uschia ha la centrala chantunala dal SIG pudì cumenzar gia l'onn 1992 cun ses manaschi.
Oz po mintgina e mintgin consultar e retrair las geodatas en l'internet tar il center da geodatas dal Grischun sut
www.geogr.ch. Dapi l'installaziun da questa pagina d'internet il mars 2008 èn ils servetschs e la purschida da datas vegnids extendids cuntinuadamain. Principalmain dumandadas èn las datas dals secturs da la mesiraziun uffiziala, da la planisaziun d'utilisaziun, da la planisaziun directiva, da la natira e da l'ambient sco er dal guaud e da la selvaschina.
Novas directivas da la confederaziun
Cun la lescha federala davart la geoinfurmaziun, ch'è entrada en vigur il 1. da fanadur 2008, ha la confederaziun repassà dal tuttafatg la basa giuridica per sias geodatas e dà in rom unitar a quellas. Il nov dretg da geoinfurmaziun regla d'ina vart la registraziun da las geodatas da la confederaziun e da l'autra vart er la retratga da questas datas, las qualas ston vegnir rendidas accessiblas al public tras servetschs da preschentaziun e da download.
A questas novas prescripziuns federalas ston ussa er vegnir adattadas las disposiziuns chantunalas, ed i sto vegnir relaschà in rom giuridic correspundent per las geodatas chantunalas. L'intent da la nova lescha chantunala da geoinfurmaziun èsi da metter a disposiziun las geodatas a las autoritads sco er a l'economia, a la societad ed a la scienza per ina vasta utilisaziun, e quai en moda simpla ed a custs raschunaivels.
Per cuntanscher questa finamira èsi necessari d'installar in center chantunal da geodatas che metta a disposiziun las geodatas. Quest center da geodatas vegn designà en la lescha sco post central da consegna en il chantun. Il chantun po dentant delegar la gestiun dal center da geodatas per part u dal tuttafatg a terzas persunas. Ultra da quai pon las vischnancas manar vinavant agens centers da geodatas.
Consultar gratuitamain geodatas da basa
La lescha prevesa plinavant che las geodatas da basa ch'èn accessiblas publicamain duain pudair vegnir consultadas gratuitamain. Er ils plans fin al format A3 duain ins pudair stampar gratuitamain. Las autoritads tegnan uschia quint dal basegn da la populaziun, numnadamain da survegnir infurmaziuns gratuitas en moda simpla e svelta. Per retrair ulteriuras geodatas vegn percunter incassada ina taxa che serva a finanziar la gestiun dal center da geodatas.
Ulteriuras novaziuns
En la nova lescha da geoinfurmaziun vegnan medemamain integradas las regulaziuns davart la mesiraziun uffiziala. Ultra da quai vul il chantun crear da nov ina basa legala per installar in cataster dals conducts respectivamain in plan da survista davart ils conducts d'ovra. La finala ha el anc integrà a medem temp en la lescha – tenor las prescripziuns da la confederaziun – la basa per installar in cataster da las restricziuns da proprietad tenor il dretg public (cataster RPDP).
Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01
Gremi: regenza
Funtauna: rg chanzlia chantunala dal Grischun