Navigation

Inhaltsbereich

  • Erste Mitteilung
  • Neuen Beitrag einfügen
La dretgira chantunala e la dretgira administrativa sco dretgiras chantunalas supremas sco er la regenza grischuna vulan coordinar lur strategias d'immobiglias, e quai en vista a la realisaziun dal project "sinergia" a Cuira. Las duas dretgiras e la regenza van d'accord ch'i resultian uschia sinergias per l'administraziun da las immobiglias da las duas pussanzas chantunalas, senza periclitar il dretg d'autonomia da las dretgiras che vegn garantì da la constituziun. Igl è previs che las dretgiras sa chasan en l'avegnir en il vegl edifizi chantunal a la Grabenstrasse a Cuira, nua ch'è plazzà actualmain l'uffizi chantunal da construcziun bassa.

Garantir il dretg d'autonomia da las dretgiras chantunalas supremas
Cun il project "sinergia" vul la regenza reunir l'administraziun chantunala, ch'è actualmain repartida sin 44 differents edifizis en la citad da Cuira, da nov en il territori a la cruschada da la Kasernenstrasse e Ringstrasse, nua che sa chatta oz l'uffizi per il traffic sin via. En sia sessiun da december 2009 ha il cussegl grond approvà da princip in rapport correspundent da la regenza ed el l'ha incumbensada cun la realisaziun. La missiva tar la construcziun d'in edifizi d'administraziun a Cuira duai vegnir suttamessa al parlament l'october vegnint.

D'ina expertisa giuridica ch'è vegnida fatga per incumbensa da las duas dretgiras chantunalas e da la regenza resulta, che las dretgiras supremas pon decider libramain davart l'infrastructura ch'ellas dovran e ch'ellas na dastgan vegnir instruidas concretamain ni dal cussegl grond ni da la regenza da sa chasar en auters biros u edifizis. Quest dretg d'autonomia da las dretgiras che vegn garantì da la constituziun premetta perquai, ch'ellas acceptian in'eventuala integraziun en la strategia chantunala d'immobiglias. Questa situaziun giuridica n'è betg vegnida resguardada en moda suffizienta da la regenza en il rom dal project "sinergia".

Cunvegna davart il diever futur da l'edifizi chantunal sco edifizi da dretgira
La dretgira chantunala, la dretgira administrativa e la regenza èn sa cunvegnidas en ina decleraziun communabla che la strategia chantunala d'immobiglias porta avantatgs tant per las dretgiras sco er per l'administraziun chantunala. Per pudair trair a niz quests avantatgs uschè bain sco pussaivel, èn las dretgiras sa decleradas prontas da far diever vinavant da l'edifizi chantunal, che vegn liber en connex cun la realisaziun dal project "sinergia", sco edifizi communabel da dretgira.

Las duas dretgiras chantunalas duain sa chasar en il vegl edifizi chantunal suenter la reuniun da l'administraziun chantunala en il territori da Cuira vest, pia il pli baud l'onn 2023.


Infurmaziuns:
- dretgira chantunala dal Grischun, dr. Norbert Brunner, president, 081 257 39 61, norbert.brunner@kg.gr.ch
- dretgira administrativa dal chantun Grischun, dr. Johann Martin Schmid, president, 081 257 39 81, johann.m.schmid@vg.gr.ch  
- regenza dal chantun Grischun, dr. Mario Cavigelli, schef dal departament da construcziun, traffic e selvicultura, 081 257 36 01, mario.cavigelli@bvfd.gr.ch


Gremi: dretgira chantunala/dretgira administrativa/regenza
Funtauna: rg departament da construcziun, traffic e selvicultura dal Grischun
Neuer Artikel