Navigation

Inhaltsbereich

  • Erste Mitteilung
  • Neuen Beitrag einfügen
Ier saira ha in chatschader indigen pudì observar in urs en la vischinanza da Susch. Pliras nursas blessadas resp. stgarpadas, ch'èn vegnidas constatadas oz en damaun en in'acla resp. sin in'alp da nursas, furneschan indizis ch'in urs è effectivamain sa trategnì ils ultims dis en Engiadina Bassa.

L'identitad da l'urs n'è betg anc clera. Fin ussa n'han ils organs da surveglianza da chatscha, ch'èn vegnids clamads immediatamain, pudì constatar nagins fastizs concrets da l'urs. Las retschertgas per identifitgar l'animal èn vegnidas iniziadas. Ils purs ed ils apiculturs èn vegnids infurmads a curta vista davart l'observaziun.

Dus urs, ch'èn dentant vegnids observads gia avant intginas emnas en la vischinanza dal cunfin svizzer, laschan almain supponer ch'i pudess danovamain sa tractar d'in immigrant dal Tirol dal Sid.

L'ultima visita d'in urs en Svizra è stada dals 17 fin ils 24 da zercladur 2010, pia avant quasi exactamain in onn. Quella giada aveva l'urs M2 visità il chantun Grischun. Suenter ina curta excursiun tras la Val Müstair e tras l'Engiadina Bassa era M2 puspè sa tratg vinavant svelt en direcziun dal Tirol dal Sid.

En las regiuns da la Val Müstair e da l'Engiadina Bassa han gì lieu ils ultims onns differentas activitads per minimar eventuals conflicts cun urs immigrants.


Infurmaziuns:
- dr. Georg Brosi, uffizi da chatscha e pestga, tel. 081 257 38 92
- Hannes Jenny, biolog da selvaschina, uffizi da chatscha e pestga, tel. 081 257 38 92


Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun
Neuer Artikel