Navigation

Inhaltsbereich

  • Erste Mitteilung
  • Neuen Beitrag einfügen
La cumissiun predeliberanta dal cussegl grond è sa fatschentada cun la missiva da la regenza davart il center administrativ, project «sinergia». Ella recumonda al cussegl grond d'acceptar il project.

En la sessiun da december 2009, en il rom dal tractament dal rapport davart la strategia d'immobiglias dal chantun Grischun, aveva il cussegl grond concludì da persequitar vinavant la varianta dal project «sinergia» per Cuira. La finamira da quest project è quella da construir in nov center administrativ chantunal cun circa 700 plazzas da lavur a Cuira vest. Sut il presidi dal deputà Ernst Casty ed en preschientscha dal cusseglier guvernativ Mario Cavigelli ha ussa la cumissiun cumpetenta dal cussegl grond predeliberà la missiva da la regenza davart il center administrativ, project «sinergia».

La missiva cumpiglia l'emprima etappa cun la construcziun d'in nov edifizi d'administraziun cun circa 400 plazzas da lavur. Per quest intent propona la regenza al cussegl grond d'approvar in credit d'impegn brut da 69 milliuns francs. Sch'il cussegl grond approvescha quest credit, vegn il pievel a decider definitivamain en chaussa a l'urna, e quai la primavaira 2012. Sch'er il pievel accepta il credit, vegn alura publitgada la stad 2012 ina concurrenza per il project «sinergia».

Renconuschì la situaziun nuncuntentaivla
Per la cumissiun predeliberanta èsi stà incontestà che la situaziun da spazi a Cuira saja nuncuntentaivla per l'administraziun chantunala, perquai che las plazzas da lavur èn repartidas sin 44 differentas immobiglias. Medemamain èsi vegni renconuschì ch'ils andaments interns pon vegnir optimads tras la construcziun d'in nov center administrativ e ch'il project na sposta naginas plazzas da lavur davent da las regiuns en la chapitala chantunala. Discussiuns cuntraversas hai dà pervia da la situaziun da traffic en il sectur da la Ringstrasse e da la Kasernenstrasse a Cuira en cas ch'il center administrativ vegniss realisà, pervia da las consequenzas che resultan en cas ch'ina part da l'administraziun chantunala banduna il center da la citad sco er pervia da la situaziun che sa dat per las lavurantas e per ils lavurants en in center administrativ cun biros che han pliras plazzas da lavur. Las opiniuns èn stadas divididas areguard l'explicaziun en la missiva che la reducziun da spazi permettia effectivamain da spargnar mintga onn custs periodics dad 1,2 fin 1,9 milliuns francs en cumparegliaziun cun il status quo. En quest punct è la maioritad da la cumissiun stada da l'avis ch'il punct essenzial dal project saja quel d'optimar ils andaments da lavur interns e betg quel da spargnar custs en cumparegliaziun cun il stadi actual.

La finala ha la cumissiun sustegnì cun 7 cunter 4 vuschs l'approvaziun da l'emprima etappa per construir in nov center administrativ chantunal a la Ringstrasse/Salvatorenstrasse ed uschia er il credit d'impegn respectiv da 69 milliuns francs. Ella recumonda pia al cussegl grond d'acceptar il project. En cas ch'il cussegl grond dess ses consentiment en la proxima sessiun d'october 2011, han dentant – sco gia menziunà – las votantas ed ils votants grischuns l'ultim pled.


Infurmaziuns:
president da la cumissiun Ernst Casty, tel. 079 445 48 01


Gremi: cumissiun predeliberanta per il rapport davart la strategia d'immobiglias dal chantun
Funtauna: rg cumissiun predeliberanta per il rapport davart la strategia d'immobiglias dal chantun
Neuer Artikel