Sin invit da la regenza visita l'ambassadur da la republica da Pologna, Jaroslaw Starzyk, mesemna, ils 12 d'october 2011, il chantun Grischun.

Accumpagnà vegn l'ambassadur polac a Berna, Jaroslaw Starzyk, da l'emprim cusseglier d'ambassada Jacek Rosa sco er da l'emprim secretari Marcin Król. Suenter il bainvegni dals giasts en la chasa grischa a Cuira è previs in gentar cuminaivel. Ils ospitants èn il president da la regenza Martin Schmid ed il chancelier Claudio Riesen.

La regenza tgira annualmain contacts cun represchentantas e cun represchentants da stadis esters en Svizra. Quests discurs èn elements impurtants da las relaziuns externas dal chantun. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.


Gremi: chanzlia chantunala dal Grischun
Funtauna: rg chanzlia chantunala dal Grischun