Navigation

Inhaltsbereich

  • Erste Mitteilung
  • Neuen Beitrag einfügen
La cumissiun predeliberanta dal cussegl grond s'exprima unanimamain per la fusiun da las vischnancas dad Igis e da Mastrils a la nova vischnanca da Landquart.

En sia missiva dals 9 d'avust 2011 propona la regenza grischuna al cussegl grond d'approvar la fusiun da las vischnancas dad Igis e da Mastrils a la nova vischnanca da Landquart. La fusiun duai vegnir realisada per il 1. da schaner 2012. Sut il presidi dal deputà Ludwig Caluori ha la cumissiun predeliberanta dal cussegl grond predeliberà questa fatschenta per mauns dal cussegl grond che la vegn a tractar en la sessiun da december vegninta. A la sesida èn stads preschents er il president da la regenza Martin Schmid e la represchentanza da las vischnancas pertutgadas.
Las votantas ed ils votants dad Igis e da Mastrils han approvà cleramain ils 15 da matg 2011 la fusiun da lur vischnancas a la nova vischnanca da Landquart. La cumissiun predeliberanta dal cussegl grond è sa laschada infurmar al lieu da represchentantas e da represchentants da las vischnancas e da las autoritads davart il project da fusiun. Suenter ina debatta detagliada ha ella decidì unanimamain da proponer al cussegl grond d'approvar la fusiun da las vischnancas dad Igis e da Mastrils e da metter en vigur il conclus per il 1. da schaner 2012. La cumissiun è persvadida ch'i sa tracta d'ina fusiun utila, da la quala resorta ina vischnanca nova e ferma per il chantun Grischun. Perquai che las duas vischnancas appartegnan al medem circul, al medem district sco er a la medema regiun, n'ha questa fusiun naginas autras consequenzas.
Cun questa fusiun tracta il cussegl grond la proxima sessiun da december ina da duas fusiuns da vischnancas da l'onn 2011. Premess ch'il cussegl grond approveschia questas duas fusiuns, dessi anc 176 vischnancas en il chantun Grischun il 1. da schaner 2012.


Infurmaziuns:
Ludwig Caluori, president da la cumissiun, tel. 078 691 66 40


Gremi: cumissiun predeliberanta per la fusiun a la vischnanca da Landquart
Funtauna: rg cumissiun predeliberanta per la fusiun a la vischnanca da Landquart
Neuer Artikel