Zum Seiteninhalt

Cas Jenatsch: Il servetsch archeologic dal Grischun ed uvestg Huonder avran la fossa intscherta

  • Erste Mitteilung
  • Neuen Beitrag einfügen
En la catedrala da Cuira vegn averta la fossa probabla da Jörg Jenatsch (1596-1639), in dals manaders da las truppas grischunas en la Guerra da trent'onns. Tenor l'istorgia è Jenatsch vegnì sturnì il favrer 1639 – durant il tschaiver – cun ina manera ed alura sepulì en la catedrala. Ussa lascha il servetsch archeologic dal Grischun evaluar il cuntegn da la fossa.

Gia l'onn 1959 aveva l'antropolog turitgais Erik Hug exhumà la bara. L'identificaziun è succedida sin basa da la vestgadira e d'ina fractura da la chavazza. Igl è però restà intschert, sch'i saja effectivamain vegnida chattada la dretga bara. Ussa duain vegnir gudagnadas novas enconuschientschas antropologicas e patologicas areguard la statura, areguard la schlattaina u areguard blessuras. Ina funtauna per l'identificaziun è anc adina la gardaroba. A maun da restanzas da sang sin parts dals vestgids duai vegnir fatg in profil dal DNA e cumpareglià cun ils profils da descendents da la famiglia Jenatsch che vivan anc. Perquai ch'i sa chattan mo pitschnas restanzas da sang sin la vestgadira han ins ussa – cun la permissiun d'uvestg Vitus Huonder – avert la fossa per survegnir ulteriuras emprovas da DNA. Pli tard vegn la chavazza dal mort purtada en l'ospital chantunal dal Grischun, nua ch'i vegn fatg in scan. Quel serva alura sco model traidimensiunal per reconstruir la fisionomia presumtiva ch'il mort aveva sco viv.

Per prender resguard da quels che van en baselgia duran las lavurs da perscrutaziun vi da la fossa mo in di. Access survegnan sulettamain ils perscrutaders cun lur vestgadira da protecziun speziala per evitar ch'i dettia ulteriuras contaminaziuns dal skelet. Pervia da la stgarsezza da temp na datti naginas intervistas a la fossa.

Gievgia, ils 15 da mars 2012, a partir da las 14.00, stattan a disposiziun davant la catedrala per dar infurmaziuns: Thomas Reitmaier, archeolog chantunal, Manuel Janosa, collavuratur dal servetsch archeologic dal Grischun e manader dal project davart la retschertga da la fossa da Jenatsch, sco er Giuseppe Gracia, responsabel per las medias da l'uvestgieu da Cuira. Fotografias digitalas èn avant maun a partir da las 13.00.
 
Bild 1
L'antropologa Christina Papageorgopoulou prenda material d'emprova or da la dentadira dal mort (foto: servetsch archeologic dal Grischun).
 
Bild 2
L'antropologa Christina Papageorgopoulou prenda in oss da la coissa or da la fossa en la catedrala a Cuira (foto: servetsch archeologic dal Grischun).

Bild 3
L'antropologa Christina Papageorgopoulou resgia material d'emprova or da l'oss da la coissa dal mort per far las analisas dal DNA (foto: servetsch archeologic dal Grischun).

Bild 4
L'antropologa Christina Papageorgopoulou prenda la chavazza presumtiva da Jörg Jenatsch or da la fossa en la catedrala a Cuira (foto: servetsch archeologic dal Grischun).

Davart ils resultats da la cumparegliaziun da DNA vegn infurmà previsiblamain la fin d'avrigl 2012.


Infurmaziuns:
servetsch archeologic dal Grischun
Thomas Reitmaier, archeolog chantunal, tel. 081 257 48 60
Manuel Janosa, manader dal project davart la retschertga da la fossa da Jenatsch, tel. 079 467 67 12

ordinariat episcopal da Cuira
Giuseppe Gracia, incumbensà per medias e communicaziun, tel. 079 632 61 81


Gremi: servetsch archeologic dal Grischun
Funtauna: rg servetsch archeologic dal Grischun
Neuer Artikel