Cuntegn da la pagina

Engrondiment dal caraun grond sin la via dal Güglia sur Cuira

  • Erste Mitteilung
  • Neuen Beitrag einfügen
Il cumenzament da fanadur 2012 cumenzan las lavurs da construcziun vi dal caraun grond sur Cuira. Il project prevesa d'engrondir il caraun stretg e stip uschia, ch'in auto da posta ed in auto da persunas pon sa cruschar senza impediments. Ils custs per engrondir la via sin ina lunghezza da circa 700 meters importan var 7 milliuns francs. I vegn fatg quint cun in temp da construcziun da 3 onns.

Tranter Cuira e Planeiras caracteriseschan dus carauns il trassé da la via dal Güglia: la storta dad Araschgen ed il caraun grond. Entant che la storta dad Araschgen è gia vegnida adattada als basegns actualas, è il caraun grond stretg e stip. L'auto da posta, ils cars ed ils camiuns pon prender quest caraun mo faschond diever d'omadus vials. Persuenter sa furman colonnas cunzunt durant las fins d'emna d'enviern. Sgriffels sin la cuvrida mussan che cunzunt ils bus grattan il vial pervia da la mancanza d'autezza. Il project prevesa d'engrondir il caraun grond stretg e stip ed ils trajects da via cunfinants uschia, ch'in car ed in auto da persunas pon sa cruschar senza impediments.

Nagina restricziun da traffic durant l'enviern
Durant las lavurs da construcziun èn tscherts impediments inevitabels. Tut tenor la fasa da construcziun sto la circulaziun vegnir manada mo sin in vial sur il plazzal. La signalisaziun vegn fatga per part cun il maun e per part cun in'ampla da traffic. Durant l'auta stagiun da stad, da mez fanadur fin mez avust, vegni desistì il meglier pussaivel da far lavurs da construcziun en il sectur dals vials. Il fatg da prender resguard dal traffic ha natiralmain er ses pretsch, quai augmenta ils custs ed il temp da construcziun. Dal cumenzament da november fin la fin da mars stattan las lavurs da construcziun airi. Il caraun grond stat puspè a disposiziun per ina circulaziun senza impediments tranter Cuira e Planeiras.

Partind da la storta dad Araschgen percurra questa nova via per gronda part il trassé existent. Il profil traversal dal traject d'ina lunghezza da circa 700 meters vegn schlargià, per lung da 6 meters, cun chinettas d'omaduas varts da la via. Las vias forestalas e las sendas da viandar existentas vegnan adattadas a las novas relaziuns. Cun excepziun dal caraun che demussa da nov ina pendenza longitudinala da 6 pertschient, resta l'ulteriur traject da via, pervia da la topografia, anc adina stip cun ina pendenza da circa 9,5 pertschient. Il caraun percurra ina lunghezza da 68 meters sin ina construcziun da sustegn. Dus mirs da sustegn da circa 174 meters e da 114 meters cunfineschan la via da la vart da la val. Las novas scarpas vegnan puspè emplantadas suenter l'engrondiment.


Agiuntas:
- fotografias dal caraun grond
JPG1

JPG2

- project da construcziun dal caraun grond
PDF


Infurmaziuns:
- Peter Stirnimann, responsabel per las medias, uffizi da construcziun bassa, tel. 081 257 37 11
- Roger Stäubli, schef da la construcziun da vias, uffizi da construcziun bassa, tel. 081 257 38 42


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun
Neuer Artikel