Bart Twaalfhoven, ambassadur dal reginavel dals Pajais bass, ha visità oz il chantun Grischun sin invitaziun da la regenza.

L'ambassadur ollandais en Svizra, Bart Twaalfhoven, e sia consorta Herine Twaalfhoven èn vegnids retschavids oz en la chasa grischa a Cuira dal president da la regenza Hansjörg Trachsel e dal chancelier Claudio Riesen. Suenter ch'igl è vegnì barattà ils salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e cun represchentants da stadis esters en Svizra. Quests discurs èn elements impurtants da las relaziuns externas dal chantun. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

 
Fotografia agiuntada:

L'ambassadur Bart Twaalfhoven e Herine Twaalfhoven (amez) vegnan retschavids en la chasa grischa dal president da la regenza Hansjörg Trachsel (a sanestra) sco er dal chancelier Claudio Riesen.


Gremi: regenza
Funtauna: rg chanzlia chantunala dal Grischun