La regenza grischuna ha deliberà per mauns dal cussegl grond la missiva tar ina revisiun parziala da la lescha davart l'assicuranza da malsauns e la reducziun da las premias. Tras questa revisiun parziala duain vegnir adattadas las premissas per il dretg da survegnir ina reducziun da las premias. Deducziuns fiscalas che n'han betg motivs socials u famigliars na duain avair nagins effects sin il dretg da survegnir ina reducziun.

Tenor la lescha vertenta davart l'assicuranza da malsauns e la reducziun da las premias (LARP) vegnan reducidas las premias da las cassas da malsauns, sch'ellas surpassan ina resalva persunala graduada tenor categorias d'entrada. L'entrada imputabla correspunda a l'entrada imponibla ch'è decisiva per fixar la tariffa plus 20 pertschient da la facultad imponibla ch'è decisiva per fixar la tariffa. Tras questa concepziun da la reducziun individuala da las premias n'han las deducziuns fiscalas betg mo consequenzas per las taglias. Perquai che las deducziuns fiscalas chaschunan in'entrada imputabla pli pitschna, han ellas er ina influenza directa sin il dretg da survegnir ina reducziun da las premias.
Questa problematica duai vegnir schliada tras ina revisiun parziala da la lescha. Deducziuns fiscalas che n'han betg motivs socials u famigliars na duain betg vegnir resguardadas per eruir l'entrada ch'è decisiva per fixar il dretg da survegnir ina reducziun da las premias. Concretamain pertutga quai numnadamain las contribuziuns inclusiv ils pajaments per sa cumprar en en instituziuns da la prevenziun professiunala, las contribuziuns a la prevenziun liada, las donaziuns voluntaras ad organisaziuns d'utilitad publica ed a partidas politicas ed ils custs da reparatura d'immobiglias.

Influenza faussa sin il dretg da survegnir ina reducziun
Tras la revisiun parziala da la lescha da taglia per il chantun Grischun – ch'è entrada en vigur il 1. da schaner 2010 e ch'è s'effectuada a partir da l'onn 2011 – èn ils imports libers da taglia vegnids augmentads tar la taglia sin la facultad. Quest augment è vegnì fatg oravant tut cun l'intent da render il Grischun pli attractiv sco lieu da domicil per pajataglias bainstants. Perquai che la calculaziun da l'entrada ch'è decisiva per stabilir il dretg da survegnir ina reducziun da las premias na metta betg mo a quint l'entrada suttamessa a la taglia, mabain er la facultad suttamessa a la taglia, sa reducescha cun l'augment dals imports da facultad libers da taglia da la facultad suttamessa a la taglia ed uschia er l'entrada ch'è decisiva per il dretg da survegnir ina reducziun da las premias.
Quest effect nunintenziunà sin il dretg da survegnir ina reducziun da las premias duai medemamain vegnir eliminà. Per calcular la reducziun da las premias duai vegnir prendida sco basa da nov la facultad netta empè da la facultad suttamessa a la taglia.

Igl è previs da tractar la missiva en il cussegl grond durant la sessiun d'avust 2013.


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Gremi: regenza
Funtauna: rg chanzlia chantunala dal Grischun