Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna refusa l'iniziativa dal pievel chantunala "Main taglia per il mastergn". Cun la taglia da cultus furneschan las baselgias chantunalas prestaziuns essenzialas a favur da la generalitad. Ina perdita da questa taglia distgargiass dentant mo minimalmain las persunas giuridicas.

Per omaduas baselgias chantunalas incassescha il chantun Grischun da las persunas giuridicas (societads anonimas, ScRL e.u.v.) ina taglia da baselgia, q.v.d. ina taglia da cultus, sin la taglia sin il gudogn e sin il chapital. Ella vegn repartida a las baselgias chantunalas en relaziun dals commembers (fin da l'onn 2012: 54,3 pertschient catolics e 45,7 pertschient refurmads). L'onn 2012 ha la taglia da cultus importà circa otg milliuns francs. 
L'iniziativa "Main taglia per il mastergn" (iniziativa davart la taglia da baselgia) vul abolir la taglia da cultus da las persunas giuridicas. Ultra da quai na duai il chantun betg pajar contribuziuns per finanziar il cultus da las baselgias e da las cuminanzas religiusas. 
L'aboliziun da la taglia da cultus avess consequenzas gravantas per las baselgias chantunalas. Tar la baselgia chantunala refurmada crudass davent circa in terz da las entradas, tar la baselgia chantunala catolica passa 90 pertschient. Sche l'iniziativa vegniss acceptada, na pudess ins betg pli finanziar ina gronda part da las purschidas da la baselgia che sa chattan ordaifer il sectur da cultus. I sa tracta qua d'incumbensas socialas, charitativas e culturalas che las baselgias adempleschan a favur da la generalitad. La regenza na vul betg cumprometter questas prestaziuns. Las consequenzas finanzialas gravantas per las baselgias chantunalas cuntrafaschessan ad ina distgargia mo marginala da las singulas persunas giuridicas. Ultra da quai èn la gronda part dals mastergnants persunas cun activitad da gudogn independenta en la furma giuridica d'ina interpresa singula u d'ina interpresa da persunas (societad singula, societad collectiva u commanditara). Las persunas natiralas cun activitad da gudogn independenta n'èn dentant betg pertutgadas da l'iniziativa, cuntrari al text. Sche l'iniziativa vegniss acceptada, na las distgargiass quai pia betg. D'agiuntar èsi ch'il tribunal federal svizzer protegia l'incassament da la taglia da baselgia da las persunas giuridicas e che la gronda part dals chantuns enconuscha ina tala taglia. La regenza propona ord quest motiv al cussegl grond da recumandar al pievel da refusar l'iniziativa davart la taglia da baselgia.

Il cussegl grond vegn a tractar l'iniziativa en la sessiun d'october 2013. 
 

Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: barbara.janom@dfg.gr.ch  
- Toni Hess, manader dal servetsch giuridic tar l'administraziun da taglia, tel. 081 257 33 26, e-mail Toni.Hess@stv.gr.ch 
 

Gremi: regenza
Funtauna: rg chanzlia chantunala dal Grischun
Neuer Artikel