Zum Seiteninhalt

Energia ord charvun

  • Erste Mitteilung
  • Neuen Beitrag einfügen
Ils 22 da settember 2013 votescha il pievel grischun davart l'iniziativa da charvun sco er davart la cuntraproposta da la regenza e dal cussegl grond. Tras la cuntraproposta vegnan las investiziuns, che las interpresas cun participaziun chantunala fan en ovras electricas a charvun, colliadas cun la cundiziun che l'emissiun da CO2 da talas ovras vegnia reducida considerablamain. La cuntraproposta correspunda a la politica da clima e d'energia da la confederaziun e da la UE.

L'iniziativa da charvun vul francar in scumond absolut per il purtader d'energia "charvun", senza resguardar il progress tecnologic en la producziun d'electricitad ord charvun. Sche l'iniziativa vegniss acceptada, vegnissan las interpresas d'energia grischunas exclusas dal tuttafatg dal segment da charvun e disfavurisadas en moda nunponderada sin il martgà europeic. Il scumond da tecnologia na duai plinavant betg mo valair per projects futurs, mabain vul er sfurzar la Repower da sortir dal project da forza electrica ord charvun a Saline Joniche (Italia). Quest project, ch'è gia sviluppà fitg lunsch, è vegnì qualifitgà da las autoritads talianas cumpetentas sco cumpatibel cun l'ambient. 

La forza electrica ord charvun en il context europeic
L'energia ord charvun è oz in element fix dal provediment d'electricitad en l'Europa e vegn a daventar anc pli impurtanta en l'avegnir en il rom da la politica da clima e d'energia da la UE. Impressiunant è en quest connex in sguard sin la Germania, noss pajais vischin en il nord. Là è la quota d'electricitad ord charvun gia oz auta (47%) e vegn a s'augmentar anc vinavant. En sia previsiun da l'energia mundiala parta l'agentura internaziunala d'energia AIE schizunt dal fatg ch'il charvun surpassia entaifer ils proxims 10 onns l'ieli sco furnitur d'energia il pli impurtant.
La politica da clima e d'energia da la UE sa basa sin la persvasiun che l'Europa dovria er a lunga vista ovras electricas convenziunalas e ch'il charvun – sco purtader d'energia fossila ch'è anc avant maun en abundanza – gioghia ina rolla centrala per la segirezza dal provediment d'energia. La producziun d'electricitad ord charvun è dentant colliada cun la sfida da far frunt ad ina gronda emissiun da substanzas nuschaivlas. Ma il progress tecnic permetta da reducir cuntinuadamain las substanzas nuschaivlas che resultan cun arder il charvun. Per reducir l'emissiun da CO2 dispona la UE perquai d'in urari cun cleras finamiras. Puncts impurtants èn en quest connex che l'emissiun da CO2 da tut las ovras electricas a charvun sto vegnir cumpensada a partir da l'onn 2013 a 100% e che la UE promova dal rest massivamain il svilup da novas tecnologias per producir electricitad ord charvun. En spezial vegni lavurà intensivamain vi da soluziuns per zavrar e per deponer a lunga vista il CO2.
En connex cun la producziun d'electricitad promova L'Europa pia er vinavant l'energia ord charvun, dentant cun la finamira d'utilisar il charvun tant sco pussaivel senza chaschunar emissiuns. 

La cuntraproposta correspunda a la politica d'energia grischuna
En vista als svilups en l'Europa sa mussi ch'il scumond da tecnologia, che vegn pretendì da l'iniziativa da charvun, è la faussa via. La cuntraproposta tegna er quint da svilups futurs, tras quai ch'ella pussibilitescha il progress tecnologic ed ha a medem temp la finamira da reducir directamain l'emissiun da CO2 empè da scumandar immediatamain ed en general il purtader d'energia "charvun". Uschia poi vegnir evità ch'il Grischun sto ir sulet ina via radicala e che las interpresas d'energia grischunas vegnan disfavurisadas sproporziunadamain sin il martgà d'electricitad europeic. Plinavant impedescha la cuntraproposta che la decisiun da realisar l'ovra electrica Saline Joniche, che la Repower ha prendì sin basa da las reglas vertentas svizras e talianas, vegn annullada posteriuramain tras prescripziuns statalas. La cuntraproposta evitescha pia ultra da quai il privel ch'il chantun Grischun sto vender sia participaziun vi da la Repower. 
In proceder pass per pass cun cleras finamiras correspunda er als princips da la politica da clima e d'energia en il sectur dals edifizis, nua ch'il chantun Grischun ademplescha incumbensas impurtantas. En quest connex èn la reducziun da l'emissiun da CO2 ed il remplazzament da purtaders d'energia fossila duas finamiras principalas da la politica d'energia grischuna. Ellas èn fixadas explicitamain en la nova lescha d'energia dal chantun Grischun da l'onn 2011 e vegnan realisadas cun agid d'in plan da reducziun ch'è francà en la lescha e che determinescha las finamiras en differentas etappas intermediaras fin l'onn 2035. 
Cun in na a l'iniziativa da charvun e cun in gea a la cuntraproposta da la regenza e dal cussegl grond po il Grischun far in ulteriur pass responsabel e raschunaivel sin la via tschernida en la politica d'energia e da clima. 
 

Infurmaziuns: 
- dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail Mario.Cavigelli@bvfd.gr.ch  
- Remo Fehr, manader da l'uffizi per la natira e l'ambient dal Grischun, tel. 081 257 29 41, e-mail Remo.Fehr@anu.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel