Navigation

Inhaltsbereich

  • Erste Mitteilung
  • Neuen Beitrag einfügen
Cunquai ch'i dat la protecziun civila dapi 50 onns en Svizra vegn renovà l'equipament da la protecziun civila dal Grischun. A chaschun dal curs da repetiziun da la cumpagnia da protecziun civila dal Partenz è gievgia, ils 22 d'avust 2013, vegnì preschentà a Schiers l'equipament nov dals appartegnents da la protecziun civila sco er il material da protecziun civila nov. Cun quai è l'equipament da 18 onns dals appartegnents da la protecziun civila vegnì adattà al standard actual.

L'onn 1963 è il cumenzament per propi da la protecziun civila da la Svizra. Il 1. da schaner 1963 è la lescha federala davart la protecziun civila entrada en vigur e per la medema data è vegnì stgaffì l'uffizi federal da protecziun civila. Er l'onn 1963 è la lescha federala davart las construcziuns da protecziun civila vegnida approvada da l'assamblea federala. Il project "Protecziun civila 1995" ha avert la protecziun civila en direcziun da l'agid en cas da catastrofas e d'urgenza. Quai è capità cun la fin da la guerra fraida. Dapi lura è il focus sa drizzà sin la protecziun da la populaziun e sin la prestaziun d'agid en cas da catastrofas e da situaziuns d'urgenza. Nagin auter stadi da quest mund n'ha prendì mesiras uschè cumplessivas per proteger sia populaziun cunter eveniments extraordinaris. L'onn 2013 po la Svizra guardar enavos sin l'istorgia da 50 onns da sia protecziun civila.

Equipament nov – in grond pass per la protecziun civila grischuna

La protecziun civila che entra en acziun sco organisaziun partenaria da la protecziun da la populaziun en cas da catastrofas e da situaziuns d'urgenza sto avair in equipament pratic ed adequat per augmentar la capacitad d'intervenziun dals ulteriurs partenaris da la protecziun da la populaziun tar acziuns en cas d'eveniments spezials ed extraordinaris. La quantitad e l'intensitad d'inundaziuns, da stemprads, da bovas e da lavinas s'augmenta dad onn ad onn, quai mussan cleramain ils ultims exempels da Domat e da Saas.
A chaschun d'ina orientaziun da las medias en la chamona "Kalchofen" tar Schiers èn vegnids preschentads la nova vestgadira da lavur dals appartegnents da la protecziun civila sco er il nov material da corp da la protecziun civila ch'è vegnì adattà a las periclitaziuns actualas. Tut en tut èn vegnids acquistads 2500 exemplars da l'equipament persunal. Quest equipament consista d'in t-shirt, d'in roll-shirt, d'ina giacca da fleece, d'ina giacca e d'ina chautscha da lavur, d'ina chapitscha cun pala, d'ina giacca e d'ina chautscha cunter la plievgia, da guants, d'ina chapellina da protecziun, d'ina chapitscha rullada sco er d'ina tastga. Ils custs d'acquist totals dals equipaments muntan a var 1,2 milliuns francs, q.v.d. ca. 500 francs per equipament. Tar il material da corp tutga anc ina giacca ed ina chautscha grossa cunter il fraid. Las cumpagnias da la protecziun civila dal Grischun vegnan u èn gia vegnidas equipadas en il curs da repetiziun 2013 cun ils apparats da func POLYCOM ed instruidas en la manipulaziun. Uschia vegni garantì che tut ils partenaris da la protecziun da la populaziun pon ussa communitgar in cun l'auter cun in unic sistem da func.

Cudesch tar ils 50 onns protecziun civila
L'uffizi federal da protecziun da la populaziun prenda il giubileum da 50 onns protecziun civila sco occasiun da dar in sguard enavos sin la realisaziun e sin il svilup da la protecziun civila e da la protecziun da la populaziun en Svizra en in cudesch da giubileum "50 onns protecziun ed agid / La protecziun civila e da la populaziun en Svizra en il decurs dal temp 1963 – 2013". En quest cudesch vegnan documentads visiuns e lavur da piunier, dischaccords e sconfittas, creativitad e nunstanclentaivladad sco er la solidaritad ed ils success. Il cudesch po vegnir cumprà per 65 francs tar l'uffizi federal per edifizis e logistica, vendita da publicaziuns federalas, CH-3003 Berna, www.bundespublikationen.admin.ch, numer d'artitgel: 506.060.d, ISBN 978-3-905782-82-0.
 
Incumbensas da la protecziun civila
En cas d'eveniments spezials e da situaziuns extraordinarias ha la protecziun civila las suandantas incumbensas:
- prestar agid en cas da donns elementars (p.ex. salvaments or da ruinas, lavurs tecnicas da segiranza per limitar ils donns, lavurs da reparaziun)
- dar sustegn, sche infrastructuras criticas na funcziunan betg pli (p.ex. sustegn logistic da la populaziun pertutgada)
- prestar agid en cas d'eveniments dad ABC (p.ex. mesirar la dosa dal lieu en cas d'ina radioactivitad augmentada, installar e manar posts da decontaminaziun)
- assister e tgirar persunas che tschertgan protecziun e ch'èn senza tetg
- rinforzar il sustegn da la direcziun e da la logistica
- proteger bains culturals (en collavuraziun cun ils pumpiers)
- metter a disposiziun meds per alarmar la populaziun
- metter a disposiziun l'infrastructura da communicaziun
- metter a disposiziun e manar l'infrastructura da protecziun
- sustegnair las organisaziuns partenarias en la protecziun da la populaziun
Ulteriuras infurmaziuns davart la protecziun civila sut www.amz.gr.ch  

Fotografia agiuntada:

La nova vestgadira da lavur da la protecziun civila


Infurmaziuns:
- cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch  
- Hans Gasser, schef da l'uffizi da militar e da protecziun civila dal Grischun, tel. 081 257 35 22, e-mail: Hans.Gasser@amz.gr.ch


Gremi: departament da giustia, segirezza e sanadad dal Grischun
Funtauna: rg departament da giustia, segirezza e sanadad dal Grischun
Neuer Artikel