Jan Luykx, ambassadur dal reginavel da la Belgia, ha visità oz il chantun Grischun sin invitaziun da la regenza.

L'ambassadur beltg en Svizra, Jan Luykx, e sia consorta Raka Singh èn vegnids retschavids oz en la Chasa grischa a Cuira dal president da la regenza Hansjörg Trachsel e dal chancelier Claudio Riesen. L'ambassadur beltg è vegnì accumpagnà da l'attasché d'economia Michel Patteet sco er dal consul onurari a Son Gagl, Bruno Bauer, e da sia consorta Verena Bauer. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns externas dal chantun. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.
 

Fotografia agiuntada:

L'ambassadur Jan Luykx e sia consorta Raka Singh (amez) vegnan retschavids en la Chasa grischa dal president da la regenza Hansjörg Trachsel (a sanestra) sco er dal chancelier Claudio Riesen (a dretga).


Gremi: regenza
Funtauna: rg chanzlia chantunala dal Grischun