Zum Seiteninhalt

La fundaziun Stavros S. Niarchos conceda contribuziuns

  • Erste Mitteilung
  • Neuen Beitrag einfügen
Il cussegl da fundaziun da la fundaziun Stavros S. Niarchos ha examinà er quest onn las dumondas da contribuziun per projects dals secturs cultura, scienza e fatgs socials. Circa 60 projects vegnan sustegnids cun ina contribuziun finanziala.

La fundaziun ch'è vegnida fundada l'onn 2000 ha l'intent da sustegnair mintga onn finanzialmain projects culturals, scientifics e socials en il chantun Grischun sco er instituziuns grischunas che s'engaschan sin quest champ. Il cussegl da fundaziun sa cumpona da Philip Niarchos (president), da Spyros Niarchos, d'Alois Jurt, advocat, da Barbara Janom Steiner, cussegliera guvernativa dal chantun Grischun, e da Barbara Gabrielli, manadra da l'uffizi da cultura dal Grischun.

Il cussegl da fundaziun sa scuntra mintgamai la primavaira per tractar las dumondas da projects. Er per la sesida da quest onn èn puspè vegnids inoltrads numerus projects interessants ed innovativs da tut las regiuns dal chantun Grischun. Grazia al grond engaschament da la famiglia Niarchos han pudì vegnir sustegnids cun ina contribuziun finanziala 58 projects da las totalmain 137 dumondas. Quests projects derivan oravant tut dals secturs musica, teater, art figurativ ed istorgia culturala.

La fundaziun Stavros S. Niarchos ha ina gronda impurtanza per il chantun Grischun. Cun ses agid pon numnadamain vegnir promovids supplementarmain projects da gronda valur en il chantun. 
 

Infurmaziuns:
Barbara Gabrielli, manadra da l'uffizi da cultura dal chantun Grischun, tel. 081 257 48 01, e-mail Barbara.Gabrielli@afk.gr.ch  
 

Gremi: uffizi da cultura
Funtauna: rg uffizi da cultura
Neuer Artikel