Tut las votantas e tut ils votants dal chantun Grischun duain pudair votar ed eleger electronicamain sur l'internet a partir da l'onn 2020. Per quest intent vul la regenza grischuna cuntinuar cun la collavuraziun ch'exista cun il consorzi vote électronique. A partir da l'onn 2016 èn planisadas emprimas emprovas da pilot cun las votantas ed ils votants chantunals.
Il chantun Grischun fa dapi l'onn 2010 experiments cun la votaziun electronica per las votantas svizras ed ils votants svizzers a l'exteriur. A chaschun da 14 votaziuns federalas e chantunalas sco er a chaschun da las elecziuns dal cussegl naziunal da l'onn 2011 han els pudì dar giu lur vusch sin via electronica. Tut ils experiments han pudì vegnir fatgs cun success. Adina dapli votantas svizras e votants svizzers a l'exteriur fan diever da questa purschida (vesair la grafica). La basa tecnica da las emprovas cun la votaziun electronica è ina plattafurma che vegn manada cuminaivlamain dals otg chantuns Grischun, Turitg, Argovia, Schaffusa, Turgovia, Son Gagl, Soloturn e Friburg en il rom dal consorzi vote électronique.
Pass per pass ad ina votaziun electronica en tut il Grischun
Suenter che la fasa d'emprova ha pudì vegnir realisada cun success vul la regenza etablir la votaziun electronica sco terz chanal da votaziun cumplet sper la votaziun a l'urna e la votaziun per correspundenza. Ella planisescha d'introducir la votaziun electronica en etappas. A partir da l'onn 2016 duain en in'emprima etappa vegnir fatgas emprovas cun votantas e votants dal Grischun en vischnancas da pilot. Sche questas emprovas èn positivas, vul la regenza proponer al cussegl grond d'introducir definitivamain la votaziun electronica e da far las midadas correspundentas en la lescha. Alura duai la votaziun electronica vegnir extendida fin l'onn 2020 en etappas sin tut las vischnancas grischunas e per tut las votantas e tut ils votants dal Grischun. Quest proceder s'accorda cun la strategia dal cussegl federal che ha l'intenziun d'introducir la votaziun electronica en tut la Svizra.
Nova basa da contract
Per pussibilitar l'avanzament da la votaziun electronica ha la regenza decidì da cuntinuar la collavuraziun existenta cun il consorzi vote électronique, premess che set dals anteriurs chantuns da consorzi sa participeschian er a la cuntinuaziun. Ella ha approvà il contract da consorzi che furma la basa per la nova fasa d'emprova cun votantas e votants en Svizra Questa cooperaziun garantescha gist per in chantun che ha ina pitschna populaziun sco il Grischun ina buna relaziun dals custs e dal niz.
La segirezza è pli impurtanta ch'il tempo
Ensemen cun ils chantuns dal consorzi e cun ils partenaris privats vegn il Grischun a sviluppar vinavant il sistem da la votaziun electronica ad in sistem anc pli segir da la 2. generaziun. En il center da las novas pretensiuns da segirezza stat la verificaziun. Ella permetta da controllar cun meds independents, sche la vusch è vegnida transmessa en moda correcta, sch'ella è vegnida registrada e dumbrada. Fin l'onn 2015 duai esser avant maun in sistem verifitgabel individualmain e fin l'onn 2018 in sistem verifitgabel cumplettamain. Pir quests pass da cumplettaziun pussibiliteschan d'introducir la votaziun electronica en tut il Grischun. Ultra da l'ulteriur svilup permanent dal sistem da la votaziun electronica ston ils sistems perifers vegnir installads resp. engrondids sin plaun chantunal e communal. Latiers tutgan per exempel la cumposiziun d'in register electoral virtual u l'extensiun dal sistem da votaziun e d'elecziun existent. Per quest ulteriur svilup vegn fatg quint cun custs d'investiziun e da gestiun da circa 730 000 francs per ils onns 2015-2018. Quests custs vegnan finanziads tras il quint current. Ils credits correspundents duain vegnir fixads mintga onn dal cussegl grond cun il preventiv.
Svilup da las votantas e dals votants svizzers a l'exteriur che voteschan sin via electronica en il Grischun
Infurmaziuns:
chancelier dr. Claudio Riesen, tel. 081 257 22 21
Gremi: regenza
Funtauna: rg chanzlia chantunala dal Grischun