L'archiv dal stadi dal Grischun preschenta in nov tom dal cudesch da documents grischun. Il tom 7 cumpiglia 708 documents dal territori dal Grischun odiern. Vitiers vegnan 39 supplements da pli baud.

Ils documents nov edids dateschan dals onns 1370 fin 1385. L'ediziun cuntegna temas sco dispitas d'alp al Lucmagn u en la Bregaglia, venditas da tschains da caschiel, da nursas u da pestga fin a las dispitas davart il chastè a Clavenna. I èn vegnids transcrits documents da pergiamina ord passa 100 differents archivs e preparads per in'ediziun professiunala. Supplementarmain èn puspè reproducids en l'agiunta ils sigils ed ils segns notarials. Il cudesch cumplettescha in register da nums cumplessiv sco er glossaris dals chavazzins tudestgs e latins. 

Remartga:
Lothar Deplazes / Immacolata Saulle Hippenmeyer (elav.):
Cudesch da documents grischun, tom VII (1370–1385)
edì da l'archiv dal stadi dal Grischun, Cuira 2014
ISBN 978-3-7995-7106-7
Per far recensiuns po il cudesch vegnir retratg tar il secretariat da l'archiv dal stadi dal Grischun (tel. 081 257 28 03, e-mail info@sag.gr.ch). 

Vernissaschas dal cudesch:
Codice Diplomatico dei Grigioni, tomo sette (1370–1385)
a Puschlav, sonda, ils 21 da zercladur 2014, a las 17.00
Palazzo Landolfi, Via da Mez, Puschlav
Referents: dr. Lothar Deplazes e dr. Immacolata Saulle Hippenmeyer

Cudesch da documents grischun, tom VII (1370–1385)
a Cuira, mesemna, ils 25 da zercladur 2014, a las 18.00
archiv dal stadi dal Grischun, Karlihofplatz, local polivalent en il 3. plaun
Referents: cusseglier guvernativ Martin Jäger, dr. Lothar Deplazes e dr. Immacolata Saulle Hippenmeyer

Link: Flyer d'invit per las duas vernissaschas 

Agiunta:
Document dal 1. da november 1385 (Archiv communal da Tiraun, Madonna di Tirano, 599) 
 

Infurmaziuns:
Reto Weiss, archivari dal stadi, tel. 081 257 28 01, e-mail: Reto.Weiss@sag.gr.ch  
 

Gremi: archiv dal stadi dal Grischun
Funtauna: rg archiv dal stadi dal Grischun