Navigation

Inhaltsbereich

  • Erste Mitteilung
  • Neuen Beitrag einfügen
La cumissiun dal cussegl grond per sanadad e fatgs socials ha deliberà senza adattaziuns la missiva da la regenza davart la revisiun parziala da la lescha introductiva tar las leschas federalas davart l'assicuranza da vegls e survivents e davart l'assicuranza d'invaliditad sco er l'ordinaziun executiva correspundenta. 

Sut la direcziun da la presidenta da la cumissiun Gabriela Tomaschett-Berther ed en preschientscha da cusseglier guvernativ Hansjörg Trachsel, schef dal departament d'economia publica e fatgs socials, sco er dal directur da l'institut d'assicuranza sociala Carl Hassler ha la cumissiun per sanadad e fatgs socials predeliberà la missiva da la regenza. La missiva tracta l'organisaziun da l'institut d'assicuranza sociala (IAS). Quella duai vegnir adattada als princips da la public corporate governance ch'il cussegl grond ha discutà il december 2010. La consequenza è tranter auter quella che nagin commember da la regenza na vegn pli a far part da la cumissiun administrativa, ch'è l'organ directiv strategic dal IAS.

La cumissiun è entrada unanimamain sin il project ed ha deliberà quel senza midar il sboz da la lescha. Chaschunà ina discussiun ha sulettamain la circumstanza che la cumposiziun da la cumissiun administrativa dal IAS na duai betg pli vegnir fixada en la lescha. Il dretg vertent prescriva numnadamain che la cumissiun administrativa stoppia sa cumponer en moda adequata tant da persunas ch'èn obligadas da pajar contribuziuns sco er da persunas assicuradas. Quai na permetta dentant betg ina cunfinaziun clera, cunquai che tut las persunas che abitan en Svizra pajan d'ina vart contribuziuns d'assicuranza ed èn da l'autra vart persunas assicuradas. Pli impurtant è ch'ils commembers da la cumissiun administrativa disponan d'experientscha da direcziun, da cumpetenza professiunala e da cumpetenza sociala. Ina minoritad da la cumissiun vegn a pretender dal cusseglier guvernativ Trachsel en la debatta dal cussegl grond ina decleraziun da protocol che garantescha che er represchentants d'organisaziuns da persunas impedidas fetschian vinavant part da la cumissiun administrativa.

Il cussegl grond vegn a tractar la fatschenta en la sessiun d'avust 2014. 
 

Infurmaziuns:
presidenta da la cumissiun Gabriela Tomaschett-Berther, tel. 081 920 22 22


Gremi: cumissiun per sanadad e fatgs socials
Funtauna: rg cumissiun per sanadad e fatgs socials
Neuer Artikel