Cuntegn da la pagina

Pronts per futurs stemprads

  • Erste Mitteilung
  • Neuen Beitrag einfügen
La gruppa svizra per selvicultura da muntogna sco rait dals spezialists svizzers per la tgira dal guaud da muntogna salva questa stad ina dieta sut la devisa "Ir enturn en moda pli effizienta e pli efficazia cun ils donns da stemprads en il guaud da muntogna". La gruppa consista da circa 50 commembers che derivan da l'entira Svizra e da l'exteriur vischin. L'inscunter ha lieu dals 20 fin ils 22 d'avust a Cuira.

En il center da la discussiun stattan las surfatschas da guaud ch'èn vegnidas donnegiadas fermamain la fin da favrer 1990 tras il stemprà Vivian. Durant trais dis vegnan barattads ed evaluads las experientschas ch'èn vegnidas fatgas en la pratica ed ils resultats da la perscrutaziun da l'institut federal per la perscrutaziun da guaud, naiv e cuntrada (WSL). Ils resultats da la discussiun duain permetter als practicists forestals da reagir svelt e cunzunt cun las dretgas mesiras envers futurs stemprads.
L'onn 1990 ha il Vivian culpì ferm ils guauds tar Curaglia, Mustér, Tujetsch e Pfäfers (Son Gagl). La dimensiun enorma dals donns ha pretendì ina priorisaziun rigurusa. Sin intginas surfatschas han ins laschà star tut la laina terrada. Plantaziuns da bostgs giuvens èn vegnidas fatgas mo sin ina part da las surfatschas donnegiadas. Als lieus ils pli exposts han percunter stuì vegnir construids rempars, cunzunt cunter moviments da la naiv. 

Sa meglierar cun dumandar
Co èn sa cumprovads quests differents tractaments? Èsi per exempel stà gist da surlaschar ina part da las surfatschas donnegiadas a la regiuvinaziun natirala? È la laina terrada da quella giada in privel u promova ella percunter la naschientscha d'in guaud? Intervegniss ins oz auter, cunquai ch'ins enconuscha ils resultats? Per respunder talas dumondas vegnan ils participants a sa render en gruppas en las 16 anteriuras surfatschas donnegiadas dal Vivian. Enconuschend las mesiras prendidas ed ils resultats da la perscrutaziun qua avant maun vegnan els ad analisar il stadi acual dal guaud.
En l'aula da la scola spezialisada superiura da la Svizra sidorientala (ibW) a Cuira vegnan resumads a la fin da la dieta ils resultats da las lavurs en gruppa e preschentads sco sintesa. 
 

Remartga per las medias:
Las medias vegnan envidadas d'accumpagnar las gruppas en lur lavur da champagna gievgia, ils 21 d'avust 2014. Per plaschair s'annunziar tar richard.walder@awn.gr.ch u tel. 081 257 38 54 (uras e lieu d'inscunter). Al lieu datti la pussaivladad da far intervistas cun las suandantas persunas:
- Beat Fritsche, uffizi forestal superiur da l'Appenzell Dador, manader da la gruppa per la tgira dal guaud da muntogna
- Raphael Schwitter, manader dal post spezialisà per la tgira dal guaud da muntogna
- Renaldo Lutz, uffizi da guaud e privels da la natira dal Grischun, inschigner forestal regiunal Mustér
- Corsin Flepp, selvicultur da revier Medel
- Thomas Brandes, inschigner forestal regiunal, regiun forestala Sargans, chantun Son Gagl


Gremi: uffizi da guaud e privels da la natira
Funtauna: rg uffizi da guaud e privels da la natira
Neuer Artikel