Navigaziun principala

Cuntegn da la pagina

Deliberà il rapport davart il svilup economic en il chantun Grischun

  • Erste Mitteilung
  • Neuen Beitrag einfügen
En il rapport mussa la regenza pussaivladads da realisar in svilup economic interdisciplinar e progressiv. I sa mussa en quest connex ch'igl è pli impurtant da prender mesiras en ils singuls secturs politics per cuntanscher in svilup economic, che da realisar las mesiras enconuschentas da la promoziun da l'economia. En ses facit constatescha la regenza tranter auter ch'ils meds finanzials èn stgars e ch'igl è necessari da metter l'accent sin l'utilisaziun da quels. Quai includa er ina planisaziun sistematica da renunzias. La regenza vul da princip renunziar a mesiras che mantegnan las structuras ed insista d'orientar la promoziun tenor la basa d'export. Ultra da quai è ella pronta da metter a disposiziun 50 fin 80 milliuns francs da l'agen chapital per in program d'impuls sistematic per l'infrastructura.

Il zercladur 2013 è la regenza stada pronta da suspender la revisiun totala currenta da la lescha per promover il svilup economic a favur da l'elavuraziun d'in rapport cumplessiv davart il svilup economic en il chantun Grischun. Il rapport interdepartamental ch'è ussa avant maun dat ina survista cumplessiva davart il svilup economic dal chantun Grischun. Questa survista mussa il svilup en ils singuls secturs politics e las finamiras per il futur. La strategia da la regenza areguard la politica economica per la proxima perioda da program vegn preschentada en il rom dal program da la regenza 2017 – 2020, e quai resguardond questas finamiras. En ses rapport sa focussescha la regenza sin quellas parts dals secturs politics che chaschunan che meds finanzials producids da l'economia da martgà afflueschan nà da l'extern, quai ch'è interessant per l'economia publica. Svilups economics a l'intern na vegnan betg tractads en il rapport, malgrà che l'industria grischuna, il mastergn ed il sectur da servetschs han ina rolla impurtanta e stgaffeschan e mantegnan plazzas da lavur impurtantas ordaifer ils centers. 

Analisa dal svilup economic
Malgrà che las ratas da creschientscha dal product naziunal brut (PNB) èn s'augmentadas e la dischoccupaziun è bassa, sa mussa il svilup economic en il Grischun pauc dinamic. En tut è la differenza tranter la creschientscha economica en il Grischun ed en Svizra vegnida adina pli gronda dapi la mesadad dals onns novanta. Er entaifer il chantun sa mussan differenzas considerablas tranter las singulas regiuns. Ils motivs èn la midada da las structuras agriculas e, cumbinà cun quella, l'aboliziun da plazzas da lavur en las regiuns perifericas sco er la reducziun da las frequenzas turisticas. Quels motivs influenzeschan en bleras regiuns directamain il svilup economic general, perquai ch'i manca là la diversificaziun. Singuls territoris en il Grischun che dependan per il solit main fitg dal turissem pon registrar ratas da creschientscha medias en la cumparegliaziun naziunala. Quai resulta cunzunt dal svilup en general bun da l'industria grischuna e da la creschientscha dal sectur public. 

Mesiras a favur dal svilup economic
En ses rapport fa la regenza la differenza tranter il svilup economic en il senn pli stretg ed il svilup economic en il senn pli general. Il svilup economic en il senn pli stretg sa basa sin la lescha per promover il svilup economic en il chantun Grischun, entant ch'il svilup economic en il senn pli general sa referescha a la promoziun en il rom dals secturs politics. Areguard il svilup economic en il senn pli stretg sa tegna la regenza vi dal princip da la promoziun che sa basa sin la teoria da la basa d'export. Da mesiras che mantegnan las structuras sco il sustegn da sanaziuns u ina promoziun explicitamain pli ferma da territoris economicamain pli debels vul ella desister er vinavant. Ultra da quai duai vegnir renunzià en il futur a la promoziun da manaschis singuls en il sectur da l'industria e dal mastergn sco ch'igl è pussaivel fin ussa. La libertad d'agir finanziala vegn limitada pli e pli. Mesiras per promover l'economia en il senn pli stretg ed en il senn pli general che custan survegnan perquai cunfins stretgs. 

Masterplans – la basa per investiziuns
La regenza insista sin sia strategia da rinforzar centers regiunals. En vista a las consequenzas da l'iniziativa cunter las abitaziuns secundaras ed ulteriurs svilups che vegnan spetgads sin plaun naziunal, dastgass l'impurtanza dal turissem en il territori da muntogna anc crescher. La promoziun dal svilup economic en quests territoris è perquai savens er colliada cun il sustegn d'activitads e d'infrastructuras turisticas. Per pudair dar impuls, en spezial en il sectur da l'infrastructura turistica centrala e tar las infrastructuras d'alloschament, è tenor la regenza necessaria ina summa da 50 fin 80 milliuns francs. Ils meds finanzials che vegnan mess a disposiziun, vegnan limitads a duas periodas da legislatura, per che projects possian vegnir iniziads e realisads svelt. Las pretensiuns per il sustegn èn grondas. Ils purschiders da servetschs en in spazi funcziunal ston l'emprim sa cunvegnir davart ina strategia cuminaivla e davart las finamiras. Ils criteris decisivs per il sustegn èn l'augment da la valurisaziun sur il project sustegnì or e la creaziun da plazzas da lavur. Ultra da quai stoi esser cler che la purschida da vendita è exclusiva. La regenza ha l'intenziun da preschentar al cussegl grond il conclus finanzial necessari per metter a disposiziun meds finanzials en il rom da la revisiun totala da la lescha per promover il svilup economic en il chantun Grischun. 

Finamiras progressivas
La regenza preschenta finamiras progressivas en differents secturs politics. En vista a la necessitad d'evitar deficits structurals e d'impunder ils meds finanzials en moda economica ed efficazia n'èsi betg pussaivel d'impedir conflicts d'interess. La soluziun premetta da far frunt en moda activa e constructiva a process da reducziun che han oramai lieu. La regenza premetta la prontezza da metter accents e prioritads ed il curaschi da prender mesiras rigurusas. Ina situaziun da partenza che fa grondas pretensiuns als differents plauns politics e che po mo purtar ina soluziun progressiva, sch'igl ha lieu ina discussiun objectiva.

Il cussegl grond vegn a tractar il rapport da la regenza en la sessiun d'october 2014. 
 

Agiunta:
Rapport davart il svilup economic en il chantun Grischun
 

Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01, e-mail: Hansjoerg.Trachsel@dvs.gr.ch  
 

Gremi: regenza
Funtauna: rg departament d'economia publica e fatgs socials
Neuer Artikel